આઇફોનનો ઑર્ડર કૅન્સલ કર્યો એટલે ફ્લિપકાર્ટ ગ્રાહકને ચૂકવશે ૧૦,૦૦૦ રૂ​પિયા

માનસિક સતામણી કરી હોવાનો આરોપ : કન્ઝ્યુમર ફોરમે કહ્યું કે ઈ-કૉમર્સ કંપનીએ એક્સ્ટ્રા પ્રૉફિટ માટે જાણીજોઈને ઑર્ડર કૅન્સલ કર્યો હતો

પ્રતીકાત્મક તસવીર

સેન્ટ્રલ મુંબઈના ડિસ્ટ્રિક્ટ કન્ઝ્યુમર ડિસ્પ્યુટ્સ રિડ્રેસલ કમિશને ઈ-કૉમર્સ કંપની ફ્લિપકાર્ટને દોષી ઠેરવીને એના પ્લૅટફૉર્મ પરથી આઇફોનનો ઑર્ડર આપનારા ગ્રાહકની માનસિક સતામણી કરવા બદલ ૧૦,૦૦૦ રૂ​પિયા ચૂકવવાનો આદેશ આપ્યો છે.

ફરિયાદી દાદરનો રહેવાસી છે જેણે ૨૦૨૨ની ૧૦ જુલાઈએ ફ્લિપકાર્ટ પરથી આઇફોન મગાવ્યો હતો અને ક્રેડિટ કાર્ડ દ્વારા ૩૯,૬૨૮ રૂ​પિયા ચૂકવ્યા હતા. આ ફોનની ડિલિવરી ૧૨ જુલાઈએ થવાની હતી, પણ ઈ-કૉમર્સ કંપની તરફથી એસએમએસ મળ્યો હતો કે ઑર્ડર કૅન્સલ થયો છે. ફ્લિપકાર્ટે કહ્યું હતું કે તેમના ઈકાર્ટ ડિલિવરી બૉયે ઘણા પ્રયાસો કર્યા હતા, પણ ફરિયાદી ઉપલબ્ધ ન હોવાથી ઑર્ડર કૅન્સલ કરવામાં આવ્યો હતો.

ફરિયાદીએ જણાવ્યું હતું કે કૅન્સલેશનથી તેને નુકસાન તો થયું જ છે, સાથે માનસિક યાતના અને ઑનલાઇન ફ્રૉડ પણ થયું છે. 

કમિશને આદેશમાં શું કહ્યું?

કંપનીએ એક્સ્ટ્રા પ્રૉફિટ મેળવવા માટે જાણીજોઈને કૅન્સલેશન કર્યું હતું જે સર્વિસમાં ખામી અને અયોગ્ય ટ્રેડ-પ્રૅક્ટિસ દર્શાવે છે. ગ્રાહકે રીફન્ડ મેળવ્યું હોવા છતાં તેના મેન્ટલ હૅરૅસમેન્ટ માટે કંપનીએ ભરપાઈ કરવી પડશે. ઈ-કૉમર્સ કંપનીએ ઑર્ડર એકપક્ષીય રીતે રદ કર્યો હતો અને પ્રોડક્ટની કિંમત ૭,૦૦૦ રૂપિયા વધી ગઈ હોવાથી ગ્રાહકને નવેસરથી ફોન ઑર્ડર કરવાનું કહેવામાં આવ્યું હતું.