27 May, 2026 07:34 AM IST | Mumbai | Gujarati Mid-day Correspondent
પ્રતીકાત્મક તસવીર
પેટ્રોલ અને ડીઝલના ભાવમાં સોમવારે વધારો કર્યા બાદ ગઈ કાલે કૉમ્પ્રેસ્ડ નૅચરલ ગૅસ (CNG)ના ભાવમાં પ્રતિ કિલો બે રૂપિયાનો વધારો કરવામાં આવ્યો છે. હવે મુંબઈમાં CNG ૮૪ રૂપિયા પ્રતિ કિલો મળશે. એક જ મહિનામાં CNGના ભાવમાં આ બીજી વાર બે રૂપિયાનો વધારો કરવામાં આવ્યો છે.
મુંબઈમાં પ્રદૂષણ ઓછું થાય એ માટે બધી જ રિક્ષા અને ટૅક્સી માટે વર્ષોથી CNG ફરજિયાત છે. એ સિવાય અનેક મુંબઈગરા પણ તેમની પ્રાઇવેટ કાર અને વાહનોમાં CNG વાપરે છે. વળી CNG પેટ્રોલ અને ડીઝલની તુલનાએ સસ્તો મળતો હોવાથી અનેક ટ્રાન્સપોર્ટર્સ પણ હવે CNGનાં વાહનો ગુડ્સ કૅરિયર તરીકે વાપરે છે. રિક્ષા, ટૅક્સી અને ગુડ્સ ટ્રાન્સપોર્ટનાં વાહનો આખો દિવસ સતત ચાલતાં રહેતાં હોવાથી એમની રોજની CNGની ખપત વધુ હોય છે. એથી એમને CNGના ભાવની અસર વધુ થતી હોય છે. મુંબઈના રિક્ષા અને ટૅક્સી યુનિયને ઑલરેડી તેમનાં ભાડાંમાં વધારો કરવામાં આવે એવી માગણી ટ્રાન્સપોર્ટ વિભાગને કરી છે. રિક્ષાનું મિનિમમ ભાડું ૨૬ રૂપિયાથી વધારીને ૩૦ રૂપિયા અને ટૅક્સીનું મિનિમમ ભાડું ૩૧ રૂપિયાથી વધારીને ૩૫ રૂપિયા કરવાની તેમણે રજૂઆત કરી છે.
