પારસિક હિલ પરથી કાર ટ્રૅક પર પટકાઈ, ટ્રેન અટકી : ૧૭ વર્ષનો ટીનેજર ચલાવી રહ્યો હતો

આ ઍક્સિડન્ટ ચોક્કસ કઈ રીતે થયો એની તપાસ વાશી ગવર્નમેન્ટ રેલવે પોલીસ અને સ્થાનિક પોલીસ કરી રહી છે

પારસિક હિલ પરથી ટ્રૅક પર ફંગોળાઈને આવી ગયેલી કારને હટાવવામાં સ્થાનિક લોકોએ પણ મદદ કરી હતી.

બેલાપુર-ઉરણ લાઇન પર પારસિક હિલની ઉપરથી જઈ રહેલી એક કાર ગઈ કાલે બપોરે ૩.૩૦ વાગ્યે હિલના રોડ પરથી સીધી ટ્રૅક પર ખાબકતાં એ કૉરિડોરની એક ટ્રેન અટકાવી દેવામાં આવી હતી. એ કાર ૧૭ વર્ષનો છોકરો ચલાવી રહ્યો હતો. તેને પણ આ ઘટનામાં ઈજા થઈ છે. સેન્ટ્રલ રેલવેના ચીફ પબ્લિક રિલેશન્સ ઑફિસર ડૉ. સ્વપ્નિલ નીલાએ કહ્યું હતું કે ‘આ ઘટનાની જાણ થતાં ઍક્સિડેન્ટલ રિલીફ વૅન તરત જ સ્પૉટ પર મોકલવામાં આવી હતી. બે કલાકની જહેમત બાદ કાર ટ્રૅક પરથી કાઢી લેવામાં આવી હતી. ઘાયલ ટીનેજરને સારવાર માટે હૉસ્પિટલમાં દાખલ કરવામાં આવ્યો હતો. આ ઍક્સિડન્ટ ચોક્કસ કઈ રીતે થયો એની તપાસ વાશી ગવર્નમેન્ટ રેલવે પોલીસ અને સ્થાનિક પોલીસ કરી રહી છે.’