14 July, 2026 07:02 AM IST | Mumbai | Gujarati Mid-day Correspondent
ટ્રેનનું AC બગડી જવાથી મુસાફરોને ગભરામણ થવા માંડી હતી એટલે સાથી પૅસેન્જરોએ તેમને મદદ કરી હતી.
સેન્ટ્રલ રેલવેમાં ગઈ કાલે અઠવાડિયાના પહેલા જ વર્કિંગ ડેએ પીક અવર્સમાં ઍર-કન્ડિશન્ડ (AC) ટ્રેનની કૂલિંગ સિસ્ટમમાં ફૉલ્ટ આવતાં AC બંધ થઈ ગયું હતું. એને કારણે મુસાફરોએ હેરાનગતિ ભોગવવી પડી હતી એટલું જ નહીં; એક મહિલા તો બેભાન થઈ ગઈ હતી, જ્યારે અન્ય એક મુસાફરને હૉસ્પિટલમાં લઈ જવો પડ્યો હતો.
સવારે ૮.૩૩ વાગ્યાની ટિટવાલાથી છત્રપતિ શિવાજી મહારાજ ટર્મિનસ (CSMT) જતી AC લોકલ મુલુંડ સ્ટેશન પહોંચે એ પહેલાં ચાલુ ટ્રેનમાં એની કૂલિંગ સિસ્ટમમાં ફૉલ્ટ આવતાં કૂલિંગ બંધ થઈ ગયું હતું. એક તો સવારનો પીક અવર્સનો સમય હોવાથી AC ટ્રેન હોવા છતાં ટ્રેનમાં સખત ભીડ હતી. વળી AC ટ્રેન હોવાથી એના દરવાજા લૉક હતા. એથી હવાની અવરજવર અટકી ગઈ હતી અને ભીડને કારણે લોકોને ગભરામણ થવા માંડી હતી. ટ્રેનની અંદરનું ટેમ્પરેચર વધવા માંડ્યું હતું. ૧૫ મિનિટ સુધી આવી પરિસ્થિતિ રહી હતી જેને કારણે અનેક મુસાફરોને ગભરામણ થઈ હતી.
૩ પ્રવાસીઓને શ્વાસ લેવામાં બહુ જ તકલીફ પડી હતી. એક મહિલા બેભાન થઈ ગઈ હતી. એ પછી મુલુંડ સ્ટેશન પર દરવાજા ખોલવામાં આવતાં ઘણા પૅસેન્જરો મુલુડમાં જ પ્લૅટફૉર્મ પર ઊતરી ગયા હતા. ફહીમ અન્સારી નામના પૅસેન્જરને તકલીફ વધી જતાં તેને સારવાર માટે હૉસ્પિટલમાં લઈ જવો પડ્યો હતો, જ્યારે બેભાન થઈ ગયેલી એક મહિલાને અન્ય લોકોએ મદદ કરીને પ્લૅટફૉર્મ પર ઉતારીને તેને પાણી પીવડાવ્યું હતું અને હવા નાખતાં તે રિકવર થઈ ગઈ હતી. એ જ રીતે બીજી પૅસેન્જરને પણ ખુલ્લી હવા મળતાં તે પણ રિકવર થઈ ગઈ હતી. લોકોએ તેને પણ પાણી પીવડાવ્યું હતું અને કપાળ પર ભીનો રૂમાલ મૂક્યો હતો. એક વ્યક્તિએ તેની બૅગપૅકમાંથી ફાઇલ ફોલ્ડર કાઢી એનો પંખો બનાવીને તેને હવા નાખી હતી.
ત્યાર બાદ ટ્રેન આગળ કુર્લા સુધી દરવાજા ખુલ્લા રાખીને દોડાવવામાં આવી હતી. જોકે એ પછી એ કુર્લામાં જ ટર્મિનેટ કરી દેવાઈ હતી. એ પછી એને ACનો ફૉલ્ટ રિપેર કરવા વર્કશૉપમાં મોકલી દેવાઈ હતી. જોકે આ AC ટ્રેનની તકલીફને કારણે એની પાછળ એ જ ટ્રૅક પર આવેલી ટ્રેનો મોડી પડી હતી.
