લાલબાગના ફોટોગ્રાફીના ટીચરને મેયરના પતિ દર્શાવતો બનાવટી વિડિયો થયો વાઇરલ

સોશ્યલ મીડિયા પર આ વિડિયો પોસ્ટ કરનારી યુટ્યુબ ચૅનલ સામે પોલીસે ફરિયાદ નોંધી

પ્રતીકાત્મક તસવીર

લાલબાગ વિસ્તારમાં રહેતા અને વ્યવસાયે ફોટોગ્રાફી કરતા પંચાવન વર્ષના ટીચર રાજેશ તાવડે અને મુંબઈનાં મેયર રિતુ તાવડેની બદનામી કરવાના ઇરાદાથી સોશ્યલ મીડિયા પર વિડિયો પોસ્ટ કરનારી એક યુટ્યુબ ચૅનલ સામે કાલાચૌકી પોલીસે ગઈ કાલે ફરિયાદ નોંધી છે. ફરિયાદમાં ભ્રમિત અને ખોટો વિડિયો વાઇરલ કરવામાં આવ્યો હોવાનો આરોપ કરવામાં આવ્યો છે. યુટ્યુબ પર આવેલી એક લિન્ક દ્વારા રાજેશ તાવડેને મુંબઈનાં મેયર રિતુ તાવડેના પતિ તરીકે દર્શાવતો શૉર્ટ વિડિયો સામે આવ્યો હતો. આ વિડિયોમાં ટીચરના ફોટોગ્રાફ્સ ફેસબુક પરથી મેળવીને મુંબઈના મેયરના ફોટો સાથે જોડી દેવામાં આવ્યા હતા અને તેમના જીવન-પરિચયમાં ખોટી અને ભ્રામક માહિતી રજૂ કરવામાં આવી હતી. કાલાચૌકી પોલીસ-સ્ટેશનના એક સિનિયર અધિકારીએ 
‘મિડ-ડે’ને કહ્યું હતું કે ‘ફરિયાદી રાજેશ તાવડેએ યુટ્યુબ ચૅનલ gk-shorts-videos વિશે વધુ માહિતી મેળવતાં જાણવા મળ્યું હતું કે આ ચૅનલ પરથી કોઈ પણ પ્રકારની ચકાસણી કર્યા વિના જ તેમનો અને મેયર રિતુ તાવડેનો ફોટો વાપરીને આ શૉર્ટ વિડિયો ૨૩ ઑગસ્ટે અપલોડ કરવામાં આવ્યો હતો. આ પ્રકારના ખોટા દાવા દ્વારા તેમની અને મેયરની સામાજિક છબિને નુકસાન પહોંચાડવાનો પ્રયાસ કરવામાં આવ્યો હોવાની ખાતરી થતાં અમારી પાસે ફરિયાદ નોંધાવવામાં આવી છે. આ કેસમાં વિડિયો અપલોડ કરનાર વિશે વધુ માહિતી ભેગી કરવામાં આવી રહી છે.’