25 January, 2022 01:03 PM IST | Mumbai | Gujarati Mid-day Online Correspondent
તસવીર સૌજન્ય - એએફપી
અમેરિકામાં વધી રહેલી મોંઘવારી પર પ્રશ્ન પૂછાયો અને રાષ્ટ્રપતિ જો બાઇડનની છટકી ગઇ, તેમણે પત્રકારને એક મસ્ત સંભળાવી દીધી. બાઇડનનો સ્ટુપિડ સન ઑફ અ બિ... બોલતો વીડિયો વાઇરલ થયો છે. જો કે લોકો સવાલ કરી રહ્યા છે કે બાઇડનના મ્હોંમાથી આ શબ્દો નીકળ્યા ત્યારે શું તેમને ખબર હતી કે માઇક્રોફોન ચાલુ છે?
ફૉક્સ ન્યૂઝના રિપોર્ટર પીટર ડુસીએ બાઈડનને પૂછ્યું હતું કે દેશમાં સતત વધી રહેલી મોંઘવારીથી મિડ ટર્મ ઈલેક્શનમાં તમારી પાર્ટીને કેટલું નુકસાન થશે. એની પર બાઈડને જવાબ આપતાં કહ્યું હતું કે એનાથી નુકસાન નહિ, પરંતુ ફાયદો થશે અને એ પછી પત્રકારને `સ્ટુપિડ સન ઓફ બીચ` એમ કહ્યું જો કે વીડિયો પરથી સ્પષ્ટ છે કે એમનો ઇરાદો ગાળ સંભળાય એ રીતે બોલવાનો હતો જ નહીં પણ શું થઇ શકે?
બાઈડન પહેલાં પણ ઘણી વખત પત્રકારોને આ રીતે ખખડાવી ચૂક્યા છે. ગત સપ્તાહે ફોક્સ ન્યૂઝની એક મહિલા રિપોર્ટરે યુક્રેનના મામલામાં તેમને સવાલ પૂછ્યો હતો કે તમે રશિયાના રાષ્ટ્રપતિ પગલાં લે એની શા માટે રાહ જોઈ રહ્યા છો? બાઈડને આ અંગે ગુસ્સામાં કહ્યું હતું કે કેવો મૂર્ખતાભર્યો સવાલ છે. અમેરિકાના રાષ્ટ્રપતિ જો બાઈડન સત્તામાં આવ્યા ને એક વર્ષ પૂર્ણ થયું છે. અફઘાનિસ્તાનમાંથી અમેરિકાના સૈનિકોને પરત બોલાવી લેવાના તેમના નિર્ણય પર હજુ પણ સવાલો થઈ રહ્યા છે. ગુરુવારે આવા જ એક સવાલનો જવાબ આપતાં તેમણે કહ્યું હતું કે અફઘાનિસ્તાનમાં કોઈ સરકાર સફળ ન થઈ શકે.