17 May, 2022 08:54 AM IST | Washington | Gujarati Mid-day Correspondent
પ્રતીકાત્મક તસવીર
ન્યુ યૉર્ક સ્ટેટના એક ગ્રોસરી સ્ટોરમાં ગોળી મારીને ૧૦ જણની હત્યાના માત્ર એક દિવસ બાદ રવિવારે રાત્રે અમેરિકામાં ગોળીબારની બે અલગ-અલગ ઘટનામાં ઓછામાં ઓછા ત્રણ જણનાં મોત નીપજ્યાં છે.
અધિકારીઓએ જણાવ્યું હતું કે લોસ એન્જલસ પાસે એક ચર્ચ ખાતે એક હુમલાખોરે જાહેરમાં ગોળીબાર કરતાં એક જણનું મોત નીપજ્યું હતું જ્યારે ચાર અન્ય ગંભીર અવસ્થામાં છે.
આ હત્યારો આધેડ વયનો એશિયન હોવાનું મનાય છે. ચર્ચમાં એ સમયે હાજર રહેલા લોકોએ તેને પકડીને બાંધી દીધો હતો. તેની પાસેથી બે હથિયાર જપ્ત કરાયાં હતાં.
દરમ્યાન ટેક્સાસમાં હેરિસ કાઉન્ટી શેરિફની ઑફિસમાંથી જણાવાયું હતું કે એક ફ્લી માર્કેટમાં અનેક લોકોને ગોળી મારવામાં આવી હતી, જેમાંથી બેનાં ઘટનાસ્થળે જ મોત નીપજ્યાં હતાં. શેરિફ એડ ગોન્ઝાલેઝે કહ્યું હતું કે ‘બે પાર્ટીઓ વચ્ચેની લડાઈમાંથી આ ગોળીબાર થયો હોઈ શકે છે.’