Sanatan Dharm: ભારતમાં વિવાદ વચ્ચે યુએસમાં આ દિવસે ઉજવાશે `સનાતન ધર્મ દિવસ`

અમેરિકાના એક શહેરે 3 સપ્ટેમ્બરને `સનાતન ધર્મ દિવસ` (Sanatan Dharm Divas) તરીકે ઊજવવાની જાહેરાત કરી છે. અમેરિકાના લુઇસવિલે (કેન્ટુકી) શહેરના મેયરે 3 સપ્ટેમ્બરને સનાતન ધર્મ દિવસ તરીકે જાહેર કર્યો છે

ફાઇલ તસવીર

તમિલનાડુના સીએમ એમકે સ્ટાલિન (MK Stalin)ના પુત્ર ઉધયનિધિ (Udhayanidhi Stalin)એ સનાતન પર આપેલા નિવેદન બાદ ભારતમાં હંગામો મચી ગયો છે. દરમિયાન અમેરિકાના એક શહેરે 3 સપ્ટેમ્બરને `સનાતન ધર્મ દિવસ` (Sanatan Dharm Divas) તરીકે ઊજવવાની જાહેરાત કરી છે. અમેરિકાના લુઇસવિલે (કેન્ટુકી) શહેરના મેયરે 3 સપ્ટેમ્બરને સનાતન ધર્મ દિવસ તરીકે જાહેર કર્યો છે.

મેયર ક્રેગ ગ્રીનબર્ગ વતી, લુઇસવિલેના હિંદુ મંદિરમાં મહાકુંભ અભિષેકમ ઉત્સવ દરમિયાન, ડેપ્યુટી મેયર બાર્બરા સેક્સટન સ્મિથે સત્તાવાર રીતે 3 સપ્ટેમ્બરને સનાતન ધર્મ (Sanatan Dharm) દિવસ તરીકે જાહેર કર્યો છે. આ કાર્યક્રમમાં પરમ પવિત્ર સ્વામી ચિદાનંદ સરસ્વતી, પરમાર્થ નિકેતન ઋષિકેશના પ્રમુખ શ્રી શ્રી રવિશંકર અને સાધ્વી ભગવતી સરસ્વતી, લેફ્ટનન્ટ ગવર્નર જેકલીન કોલમેન, ડેપ્યુટી ચીફ ઑફ સ્ટાફ કેઇશા ડોર્સી અને અન્ય ઘણા લોકોએ હાજરી આપી હતી.

ઉધયનિધિએ સનાતનને ડેન્ગ્યુ અને મેલેરિયા વિશે જણાવ્યું

તામિલનાડુ સરકારના પ્રધાન ઉધયનિધિ સ્ટાલિને તાજેતરમાં સનાતન નિર્મૂલન પરિષદમાં ભાગ લીધો હતો. આ દરમિયાન તેમણે કહ્યું હતું કે, “સનાતન ધર્મ (Sanatan Dharm)નો માત્ર વિરોધ જ ન કરવો જોઈએ. તેના બદલે તેને નાબૂદ કરી દેવો જોઈએ. સનાતન ધર્મ સામાજિક ન્યાય અને સમાનતા વિરુદ્ધ છે. કેટલીક બાબતોનો વિરોધ કરી શકાતો નથી, તેને નાબૂદ કરી દેવો જોઈએ. આપણે ડેન્ગ્યુ, મચ્છર, મેલેરિયા કે કોરોનાનો વિરોધ કરી શકતા નથી. આપણે તેને નાબૂદ જ કરવો પડે છેઃ. એ જ રીતે આપણે સનાતન ધર્મનો પણ નાશ કરવાનો છે.”

તેમણે કહ્યું કે, “સનાતન શું છે? આ શબ્દ સંસ્કૃત ભાષામાંથી આવ્યો છે. સનાતન ધર્મ સમાનતા અને સામાજિક ન્યાયની વિરુદ્ધ હોવા સિવાય બીજું કંઈ નથી. સનાતનનો અર્થ શું છે? તે શાશ્વત છે, જેને બદલી શકાતું નથી, કોઈ પ્રશ્ન કરી શકતું નથી અને તેનો અર્થ આ જ છે.” તેમણે આરોપ લગાવ્યો કે સનાતન લોકોને જાતિના આધારે વિભાજિત કરે છે.

ભાજપે ભારત ગઠબંધન પર નિશાન સાધ્યું

સ્ટાલિનના પુત્રના નિવેદન પર ભાજપે ભારત ગઠબંધન પર નિશાન સાધ્યું હતું. ગૃહપ્રધાન અમિત શાહે વિપક્ષી ગઠબંધનમાં સામેલ પક્ષો પર વોટ બૅન્ક અને તુષ્ટિકરણની રાજનીતિ માટે સનાતન ધર્મનું અપમાન કરવાનો આરોપ લગાવ્યો હતો. ગૃહપ્રધાન અમિત શાહે શાબ્દિક પ્રહાર કરતાં કહ્યું કે, “તમિલનાડુના મુખ્ય પ્રધાનના પુત્ર સહિત DMKના અન્ય નેતાઓ કહી રહ્યા છે કે સનાતન ધર્મને ખતમ કરી દેવો જોઈએ.” અમિત શાહ રાજસ્થાનમાં રેલીને સંબોધવા પહોંચ્યા હતા. તેમણે કહ્યું કે, “આ લોકોએ વોટ બૅન્ક અને તુષ્ટિકરણની રાજનીતિ કરવા માટે સનાતન ધર્મને ખતમ કરવાની વાત કરી છે. આપણી સંસ્કૃતિ, આપણા ઈતિહાસ અને સનાતન ધર્મનું અપમાન થયું છે.”