15 June, 2026 03:20 PM IST | Islamabad | Gujarati Mid-day Online Correspondent
ઘટનાના વીડિયોમાંથી સ્ક્રીનશૉટ (તસવીર: X)
પાકિસ્તાનના ખૈબર પખ્તુનખ્વા પ્રાંતમાં સોમવારે એક મોટી લશ્કરી વિમાન દુર્ઘટના ઘટી હતી, જેમાં પાકિસ્તાન વાયુસેના (PAF)નું તાલીમ વિમાન નિયમિત ઉડાન દરમિયાન તૂટી પડ્યું હતું. આ દુર્ઘટનામાં બન્ને પાઇલટ્સના મોત થયા હતા, જ્યારે જમીન પર રહેલા ત્રણ લોકોને ગંભીર ઇજાઓ થઈ હતી. આ દુર્ઘટના ખૈબર પખ્તુનખ્વાના મર્દાન જિલ્લામાં કાટલંગ રોડ નજીક જાબર કેનાલ વિસ્તારમાં બની હતી. પ્રત્યક્ષદર્શીઓના જણાવ્યા અનુસાર, વિમાન અચાનક નીચે ઉતર્યું અને રસ્તા પર સામાન્ય ટ્રાફિક વચ્ચે જમીન પર અથડાયું. ટક્કર થતાં, એક જોરદાર વિસ્ફોટ થયો અને વિમાનમાં આગ લાગી ગઈ. ઘટના બાદ દુર્ઘટના સ્થળેથી કાળા ધુમાડો નીકળતો જોવા મળ્યો.
પાકિસ્તાની અધિકારીઓના જણાવ્યા અનુસાર, લેફ્ટનન્ટ મુહમ્મદ કાસિમ અબ્દુલ્લા અને નેવી લેફ્ટનન્ટ તાહા અબ્બાસીનું દુર્ઘટનામાં મૃત્યુ થયું હતું. કેટલાક સ્થાનિક અહેવાલોમાં મૃતકોની ઓળખ કૅપ્ટન કાસિમ અને કૅપ્ટન તલ્હા તરીકે થઈ છે. અકસ્માત બાદ બન્ને પાઇલટ્સના મૃતદેહ સ્થળ પરથી મળી આવ્યા હતા. વિમાન રસ્તા પર પડતાં નજીકમાં હાજર ત્રણ નાગરિકો પણ ગંભીર રીતે ઘાયલ થયા હતા. દુર્ઘટનાના સમાચાર મળતાં, બચાવ ટીમો અને સ્થાનિક પ્રશાસન યુનિટ ઘટનાસ્થળે પહોંચ્યા અને રાહત અને બચાવ કામગીરી શરૂ કરી.
પાકિસ્તાન વાયુસેનાના મુખ્યાલયે અકસ્માતનું કારણ જાણવા માટે એક ઉચ્ચ સ્તરીય તપાસ બોર્ડની રચના કરી છે. પ્રારંભિક માહિતી તાલીમ મિશન દરમિયાન સંભવિત તકનીકી ખામી હોવાનું સૂચવે છે, જોકે તપાસ પૂર્ણ થયા પછી જ વાસ્તવિક કારણની પુષ્ટિ થઈ શકશે. લશ્કરની મીડિયા શાખા, ઇન્ટર-સર્વિસિસ પબ્લિક રિલેશન્સ (ISPR) એ જણાવ્યું હતું કે વિમાન નિયમિત તાલીમ મિશન પર હતું. પાકિસ્તાનના આર્મી ચીફ, ફિલ્ડ માર્શલ અસીમ મુનીર અને અન્ય વરિષ્ઠ સશસ્ત્ર દળોના અધિકારીઓએ આ ઘટના પર દુ:ખ વ્યક્ત કર્યું છે. ગૃહમંત્રી મોહસીન નકવીએ પણ અકસ્માતની પુષ્ટિ કરી છે અને મૃતકોના પરિવારજનો પ્રત્યે સંવેદના વ્યક્ત કરી છે.
પાકિસ્તાન સેનાને આગાઉ પણ એક મોટી ઉડ્ડયન દુર્ઘટનાનો સામનો કરવો પડ્યો તેના થોડા સમય પછી આ અકસ્માત થયો છે. મીડિયા અહેવાલ મુજબ, પાંચ દિવસ પહેલા, પાકિસ્તાન આર્મીનું Mi-17 હૅલિકોપ્ટર ઉડાન દરમિયાન તકનીકી ખામીને કારણે મુઝફ્ફરાબાદ નજીક ક્રૅશ થયું હતું, જેના પરિણામે બોર્ડ પર સવાર તમામ કર્મચારીઓના મોત થયા હતા. વધુમાં, 20 મેના રોજ, પાકિસ્તાનના પૂર્વી પંજાબ પ્રાંતમાં મિયાંવાલી નજીક હોંગડુ JL-8 તાલીમ વિમાન ક્રૅશ થયું હતું. જોકે, તે ઘટનામાં બન્ને પાઇલટ સમયસર બહાર નીકળવામાં સફળ રહ્યા અને બચી ગયા હતા. આ દરમિયાન, મર્દાન વિમાન દુર્ઘટનાના સીસીટીવી ફૂટેજ પણ સામે આવ્યા છે, જેમાં વિમાન ઝડપથી નીચે ઉતરતું અને ક્રૅશ થતું દેખાય છે.
