ભારતમાં પહેલી વાર રેલવે-સ્ટેશન પર હ્યુમનૉઇડ રોબો તહેનાત

વિશાખાપટનમ સ્ટેશન પર બજાવશે ફરજ, 24 કલાક કામ કરી શકશે

રેલવે પોલીસ ફોર્સ (RPF)ના આધુનિકીકરણ અને ડિજિટલ પરિવર્તન પહેલના ભાગરૂપે હ્યુમનૉઇડ રોબો ASC ARJUN તહેનાત કરવામાં આવ્યો છે.

ઈસ્ટકોસ્ટ રેલવેએ વિશાખાપટ્ટનમ રેલવે-સ્ટેશન પર હ્યુમનૉઇડ રોબો ASC ARJUN તહેનાત કર્યો છે. ભારતીય રેલવેમાં આ પ્રકારની પ્રથમ પહેલ છે. મુસાફરોની સલામતી, સુરક્ષા અને સેવાના વિતરણમાં સુધારો કરવા માટે અદ્યતન ટેક્નૉલૉજીનો ઉપયોગ કરવાની દિશામાં આ પહેલું પગલું છે. રેલવે પોલીસ ફોર્સ (RPF)ના આધુનિકીકરણ અને ડિજિટલ પરિવર્તન પહેલના ભાગરૂપે હ્યુમનૉઇડ રોબો ASC ARJUN તહેનાત કરવામાં આવ્યો છે. એ વિવિધ રેલવે-કામગીરી જેવી કે સુરક્ષા, મુસાફરોને સહાય, ભીડ-વ્યવસ્થાપન, સ્વચ્છતા-દેખરેખ અને સલામતીને પૂરક બનાવવા માટે ડિઝાઇન કરવામાં આવ્યો છે. મુસાફરોની પીક અવરજવર દરમ્યાન રોબો વધારે ઉપયોગી સાબિત થાય છે. આ રોબો સંપૂર્ણપણે વિશાખાપટ્ટનમમાં ડિઝાઇન અને વિકસાવવામાં આવ્યો છે, જેમાં સ્વદેશી નવીનતા દ્વારા અત્યાધુનિક ટેક્નૉલૉજીનો સમાવેશ થાય છે. આ અદ્યતન ટેક્નૉલૉજીના વિકાસ માટે ટીમે એક વર્ષથી વધુ સમયથી કામ કર્યું છે.

આ હ્યુમનૉઇડ રોબો ફેસ રેકગ્નિશન સિસ્ટમ (FRS), AI-આધારિત ભીડ-દેખરેખ અને RPF કન્ટ્રોલ-રૂમમાં રિયલ-ટાઇમ ચેતવણી દ્વારા ઘૂસણખોરી શોધવામાં મદદ કરવા માટે સજ્જ છે. એ અંગ્રેજી, હિન્દી અને તેલુગુમાં સ્વચાલિત જાહેરાતો કરી શકે છે, મુસાફરોને માર્ગદર્શન આપવામાં અને સલામતી અને સુરક્ષા બાબતો પર જાગૃતિ સુધારવામાં મદદ કરે છે.

પૂર્વનિર્ધારિત માર્ગો અને અવરોધ ટાળવા પર સેમી-ઑટોનોમસ નેવિગેશન સાથે ASC ARJUN ૨૪ કલાક પ્લૅટફૉર્મ પર પૅટ્રોલિંગ કરી શકે છે. એ અસરકારક દેખરેખ રાખી શકે છે. આ રોબોમાં કટોકટીની પરિસ્થિતિઓમાં સમયસર પ્રતિભાવ આપવા માટે આગ અને ધુમાડા ડિટેક્શન પ્રણાલી પણ છે.