ડોનલ્ડ ટ્રમ્પે ઈરાનનો ૭ દિવસના યુદ્ધવિરામનો પ્રસ્તાવ ફગાવ્યો

નવેમ્બરમાં યોજાનારી ચૂંટણી પછી ટ્રમ્પ ઈરાન પર ફરી બૉમ્બમારો શરૂ કરે એવી શક્યતા

ડોનલ્ડ ટ્રમ્પ

અમેરિકા અને ઈરાન વચ્ચે ચાલી રહેલા તનાવમાં એક મોટો વળાંક આવ્યો છે. અહેવાલો મુજબ અમેરિકાના પ્રમુખ ડોનલ્ડ ટ્રમ્પે ઈરાને મૂકેલા ૭ દિવસના યુદ્ધવિરામના પ્રસ્તાવને ફગાવી દીધો છે. નિષ્ણાતો માની રહ્યા છે કે અમેરિકામાં નવેમ્બરની ચૂંટણીઓ પૂરી થયા પછી ટ્રમ્પ ઈરાન પર ફરીથી બૉમ્બમારો શરૂ કરી શકે છે.
ઈરાનના વિદેશપ્રધાન અબ્બાસ અરાગચીએ સંયુક્ત રાષ્ટ્રમાં પત્રકારોને જણાવ્યું હતું કે ‘ઈરાને કતર મારફત અમેરિકાને ૭ દિવસનો એક નક્કર પ્લાન મોકલ્યો છે. જો અમેરિકા ઈરાન પરથી નૌકાદળની નાકાબંધી અને ઑઇલના પ્રતિબંધો હટાવી લે તો ઈરાન ૭ દિવસમાં જ હોર્મુઝની ખાડી ખોલવા અને પરમાણુ કાર્યક્રમ વિશે વાતચીત શરૂ કરવા તૈયાર છે.’
જોકે વૉલ સ્ટ્રીટ જર્નલના અહેવાલ મુજબ ડોનલ્ડ ટ્રમ્પે આ પ્રસ્તાવ ફગાવી દીધો હતો. ટ્રમ્પ પહેલેથી જ કહેતા આવ્યા છે કે તેઓ ઈરાનને ક્યારેય પરમાણુ બૉમ્બ નહીં બનાવવા દે. અગાઉ ૧૭ જૂને પણ બન્ને દેશો વચ્ચે મધ્યપૂર્વ યુદ્ધ ખતમ કરવા વિશે ૧૪ મુદ્દાનો એક કરાર થયો હતો, પરંતુ જુલાઈ મહિનામાં જ ટ્રમ્પે આ ડીલ તોડવાની જાહેરાત કરી દીધી હતી. ત્યાર બાદ ફરી બન્ને વચ્ચે યુદ્ધ ફાટી નીકળ્યું હતું.