21 December, 2014 05:53 AM IST |
ચીને ૧૨,૦૦૦ કિલોમીટરની રેન્જમાં ત્રાટકવાની ક્ષમતા ધરાવતા ન્યુક્લિયર કૅપેબલ ઇન્ટરકૉન્ટિનેન્ટલ બૅલેસ્ટિક મિસાઇલનું સફળ પરીક્ષણ કર્યું છે. ચીનની પીપલ્સ લિબરેશન આર્મીએ આ મિસાઇલનું મલ્ટિપલ અને ઇન્ડિપેન્ડન્ટ્લી ટાર્ગેટેબલ રી-એન્ટ્રી વેહિકલ્સ સાથેનું સંપૂર્ણ પરીક્ષણ ૧૩ ડિસેમ્બરે કર્યું હતું. આખા અમેરિકાનો ભુક્કો બોલાવી દેવા સમર્થ આ મિસાઇલ પોતાની સાથે ૧૦ વૉરહેડ્સ પણ લઈ જઈ શકે છે. આ દસ વૉરહેડ્સ રૉકેટની ફ્લાઇટના અંતિમ તબક્કામાં એનાથી અલગ થઈ જઈને નક્કી કરવામાં આવેલાં શહેરોને નિશાન બનાવી શકે છે. જોકે ચીનના લશ્કરે આ પરીક્ષણ કે વૉરહેડ્સની સંખ્યા વિશે કોઈ સ્પષ્ટતા નથી કરી.
ચીનના હાલના અણુશસ્ત્ર ભંડારમાં અંદાજે ૨૪૦ બહુ મોટાં વૉરહેડ્સનો સમાવેશ થાય છે. ચીન નવાં મલ્ટિપલ વૉરહેડ મિસાઇલ્સ ડિપ્લૉય કરવાનું છે એટલે આ સંખ્યામાં વધારો થવાની આશા છે. અમેરિકાએ ડિપ્લૉય કરેલા અણુશસ્ત્ર ભંડારમાં ૧૬૪૨ વૉરહેડ્સનો સમાવેશ છે.