પાકિસ્તાનઃ મુંબઈ હુમલાના માસ્ટરમાઈન્ડ આંતકી હાફિઝ સઈદના ઘર પાસે બ્લાસ્ટ, 3ના મોત

પાકિસ્તાનમાં મુંબઈ હુમલાના માસ્ટરમાઈન્ડ આંતકી હાફિઝ સઈદના ઘર પાસે બ્લાસ્ટ થયો છે. જેમાં 3 લોકોના મોત થયા છે.

હાફિઝ સઈદ (ફાઈલ ફોટો)

પાકિસ્તાનના લાહોરના જૌહાર તાલુકામાં એક ઘરમાં બ્લાસ્ટ થયો હતો. જેમાં 3 લોકોના મોત થયા છે, જ્યારે 20 જેટલા લોકો ગંભીર રીતે ઘાયલ થયા છે. આ બ્લાસ્ટ મુંબઈ હુમલાના માસ્ટરમાઈન્ડ આતંકી હાફિઝ સઈદના ઘરની પાસે થયો છે.

પાકિસ્તાન પંજાબના પોલીસ અધિકારીએ જણાવ્યું કે જો તે ઘરની બહાર  પોલીસ ચોકી ન હોત તો આ ઘટનામાં  ભારે જાનહાની અને નુકસાન ભોગવવું પડ્યું હતો.  તેમણે જણાવ્યું કે આ કાર બોમ્બ બ્લાસ્ટમાં 3 લોકોના મોત થયા છે, જ્યારે આશરે 20 જેટલા લોકો ઈજાગ્રસ્ત થયા છે. આ સાથે તેમણે આ ઘટનાને  આતંકવાદી હુમલો ગણાવ્યો છે.  

કાઉન્ટર ટેરરિઝમ ડિપાર્ટમેન્ટ (સીટીડી) એ બ્લાસ્ટ સ્થળ અને તમામ પાસાઓની તપાસ હાથ ધરી છે.

વધુમાં અધિકારીએ જણાવ્યું કે ઘાયલ લોકોને જિન્ના હોસ્પિટલમાં સારવાર માટે ખસેડવામાં આવ્યા છે, જ્યાં છ લોકોની હાલત નાજુક હોવાનું જણાવાયું છે. ઇજાગ્રસ્તોમાં પોલીસકર્મીઓ પણ શામેલ છે. હોસ્પિટલમાં દાખલ 17 લોકોમાંથી 6 ઇજાગ્રસ્તોની હાલત ગંભીર છે. 

બ્લાસ્ટથી આસપાસનાં મકાનોને પણ નુકસાન થયું છે. આ બ્લાસ્ટને આંખે જોનારે જણાવ્યું હતું કે તેમનું ઘર 6 વર્ષ પહેલાં જ બન્યું હતું, જે બ્લાસ્ટમાં ખરાબ રીતે ડેમેજ થયું છે. બ્લાસ્ટમાં ઘાયલ થયેલા લોકોને સ્વાસ્થ્ય સુવિધા ઉપલબ્ધ કરાવવાના નિર્દેશ આપ્યા છે. તમામ હોસ્પિટલને એલર્ટ રહેવાના નિર્દેશ આપવામાં આવ્યા છે.