28 January, 2022 01:42 PM IST | Mumbai | Gujarati Mid-day Online Correspondent
શ્વેતા તિવારી
બિગ બોસ (Big Boss) ફેમ અભિનેત્રી શ્વેતા તિવારી (Shweta Tiwari)ના બ્રાની સાઈઝ વાળા નિવેદનને લઈ વિવાદ વકર્યો છે. આ કડીમાં અભિનેત્રી વિરુદ્ધ ભોપાલના શ્યામલા હિલ્સ પોલીસ સ્ટેશનમાં ધાર્મિક ભાવનાઓને ઠેસ પહોંચાડવા બદલ FIR નોંધવામાં આવી છે.
એક વેબ સિરીઝના પ્રમોશન માટે ભોપાલ આવેલી શ્વેતાએ મીડિયા સામે કહ્યું હતું કે ભગવાન તેની બ્રાની સાઈઝ લઈ રહ્યા છે. તેણીના આ નિવેદનને કારણે તે વિવાદમાં ફસાઈ છે અને તેની મુશ્કેલી વધી છે. ભોપાલના સોનુ પ્રજાપતિએ શ્વેતા વિરુદ્ધ FIR નોંધાવી હતી.
શ્વેતા વેબ સિરીઝના પ્રમોશન માટે આવી હતી
આ પહેલા ગૃહમંત્રી નરોત્તમ મિશ્રાએ શ્વેતાના નિવેદન સામે વાંધો ઉઠાવ્યો હતો અને ભોપાલ પોલીસ કમિશનરને રિપોર્ટ સોંપવા કહ્યું હતું. પોલીસ અભિનેત્રીને તેના નિવેદન માટે નોટિસ ફટકારશે. શ્વેતા 26 જાન્યુઆરીએ ફેશન સાથે જોડાયેલી વેબ સિરીઝના પ્રમોશન માટે પ્રોડક્શન ટીમ સાથે ભોપાલ આવી હતી. જેનું શૂટિંગ ભોપાલમાં થવાનું છે.
સૌરભ રાજ જૈન શ્વેતાના `ભગવાન` હતા
શહેરની એક હોટલમાં પ્રેસ કોન્ફરન્સ દરમિયાન મીડિયા સામે શ્વેતા તિવારી જે `ભગવાન` વાત કરી રહી હતી તે આ વેબ સિરીઝમાં તેનો કો-એક્ટર સૌરભ રાજ જૈન છે. સ્ટેજ પર શ્વેતા સાથે અભિનેતા કંવલજીત, સૌરભ રાજ જૈન, રોહિત રોય અને દિગંગના સૂર્યવંશી પણ હાજર હતા. આ તમામ વેબ સિરીઝ `શોસ્ટોપર`ના પ્રમોશન અને જાહેરાત માટે આવ્યા હતા.
શા માટે શ્વેતાના નિવેદનથી વકર્યો વિવાદ
વેબ સીરિઝમાં સૌરભ બ્રા ફિટરની ભૂમિકા ભજવે છે. સૌરભ અગાઉ મહાભારત ટીવી શોમાં ભગવાન કૃષ્ણની ભૂમિકા ભજવી ચૂક્યો છે. ઈવેન્ટના હોસ્ટ સાહિલે તેને પૂછ્યું કે અત્યાર સુધી તમે ભગવાનની ભૂમિકા ભજવતા હતા અને હવે તમે સીધા બ્રા ફિટરની ભૂમિકા ભજવી રહ્યા છો. આ દરમિયાન શ્વેતા હસી પડી અને કહ્યું, `ભગવાન` ( સૌરભ રાજ જૈન) સીરિઝમાં મારી બ્રાની સાઈઝ લઈ રહ્યો છે.