નરેશ કનોડિયાના ગીતને રીક્રીએટ કર્યું હિતુ કનોડિયાએ

નરેશ કનોડિયાના ગીતને રીક્રીએટ કર્યું હિતુ કનોડિયાએ

નરેશ કનોડિયાના ફેમસ સૉન્ગ ‘સાજન તારાં સંભારણાં’ને તેમના દીકરા હિતુ કનોડિયા દ્વારા નવી રીતે રજૂ કરવામાં આવી રહ્યું છે. નરેશ કનોડિયાનું મૃત્યુ હાલમાં જ થયું હોવાથી આ ગીત દ્વારા તે તેના પિતાને ટ્રિબ્યુટ આપી રહ્યો છે. 1985ના આ ગીતને હિતુ કનોડિયા અને અભિનેત્રી મમતા સોની દ્વારા નવા અવતારમાં રજૂ કરવામાં આવ્યું છે. આ ગીતને અલ્ટ્રા મીડિયા ગુજરાતી પર શનિવારે એટલે કે 19 ડિસેમ્બરે રિલીઝ કરવામાં આવશે. આ ગીતને હરેશભાઈ પટેલે પ્રોડ્યુસ અને ડિરેક્ટ કર્યું છે. મૌલિક મહેતા દ્વારા કમ્પોઝ કરવામાં આવેલા આ ગીતને હિમાંશુ બારોટ અને નયના શર્માએ ગાયું છે. તેમ જ ગુજરાતી રૅપર અરવિંદ વેગડા પણ એમાં જોવા મળશે. આ ગીત દ્વારા તેઓ સ્વર્ગીય નરેશ કનોડિયાની 1985માં આવેલી ફિલ્મ ‘સાજન તારાં સંભારણાં’ના ટાઇટલ સૉન્ગના જાદુને ફરી રેલાવશે. તેમણે ગીતનાં સ્ટેપ નથી બદલ્યાં. ઓરિજિનલ ગીતમાં જે સ્ટેપ હતાં એ જ રાખવામાં આવ્યાં છે. આ વિશે હિતુ કનોડિયાએ કહ્યું હતું કે ‘ઓરિજિનલ સૉન્ગનો જાદુ અજોડ છે અને એની તુલના કરવી શક્ય નથી, કારણ કે મારા પિતાએ તેમની વિશિષ્ટ શૈલીથી એને ખૂબ જ સુંદર બનાવ્યું હતું. મને વિશ્વાસ છે કે ઓરિજિનલ સૉન્ગની જેમ જ આ નવું સૉન્ગ પણ હિટ રહેશે, કારણ કે જૂનાં ગીતો આપણી સંસ્કૃતિનાં રત્ન છે અને એને નવી પેઢી સુધી પહોંચાડવાં જરૂરી છે.’