20 May, 2020 08:11 PM IST | Mumbai | Gujarati Mid-day Online Correspondent
વિડિયોમાંથી લીધેલી તસવીર
પાત્રની માંગ પ્રમાણે કલાકારે અનેકવાર તેમના દેખાવ, બોલી, ચાલ અને શરીરની રચનામાં ફેરફાર કરવા પડે છે. વજન બહુ વધારવું કે ઘટાડવું એ પણ પાત્રની માંગ હોય છે. અભિનેતા પ્રતિક ગાંધીએ પણ એક પાત્ર માટે વજન વધાર્યું હતું, જે તેણે લૉકડાઉન દરમ્યાન ઓછું કર્યું છે.
સુત્રોએ આપેલી માહિતિ મુજબ, આગામી સિરીઝ 'સ્કેમ'માં હર્ષદ મહેતાના પાત્ર માટે અભિનેતા પ્રતિક ગાંધીએ દસ કિલો વજન વધાર્યું હતું. સિરીઝમાં પ્રતિક રીઅલ લાઈફનું પાત્ર ભજવે છે. જેવી લૉકડાઉનની ઘોષણા થઈ કે પ્રતિકે તાત્કાલિક નક્કી કર્યું કે વજન ઘટાડવું છે. લૉકડાઉન શરૂ થયું એના થોડાક સમયમાં જ પ્રતિકે વર્કઆઉટ કરવાની શરૂઆત કરી હતી અને વજન ઘટાડવા પર ભાર મુકવાનું શરૂ કર્યું હતું. ફરીથી પહેલા જેવું દેખાવવા માટે પ્રતિક કડક ડાયટ પ્લાન ફોલો કરે છે અને દિવસમાં બે વાર એક એક કલાક વર્કઆઉટ પણ કરે છે.
તાજેતરમાં અભિનેતા તેની વજન ઘટાડવાની આખી વાત અને વિડિયો સોશ્યલ મિડિયા પર પોસ્ટ કર્યા હતા. પ્રતિકે પાત્ર માટે વજન વધારીને 86 કિલો કર્યું હતું અને પોતાના ઓરીજનલ લુકમાં પાછા આવવા માટે અભિનેતાએ લૉકડાઉન દરમ્યાન 10 કિલો વજન ઘટાડયું છે. તેમજ બેલી ફેટ 38'' થી ઘટાડીને 33'' કર્યા છે. તેણે કેપ્શનમાં લખ્યું હતું કે, યોગ્ય ડાયટ અને ઘરમાં જ વર્કઆઉટ કરીને આ બધું શક્ય બન્યું છે.
એટલું જ નહીં લૉકડાઉન દરમ્યાન અભિનેતા પત્ની અને દીકરી સાથે વર્કઆઉટ કતો હતો તેના વિડિયો પણ અવારનવાર સોશ્યલ મિડિયા પર પોસ્ટ કરતો હતો. પ્રતિકના વર્કઆઉટ વિડિયોથી તેના ફેન્સને ઘણી પ્રેરણા મળી હતી.