10 July, 2026 07:22 PM IST | Mumbai | Gujarati Mid-day Online Correspondent
કુમાર સાનુ (સૌજન્ય: મિડ-ડે)
વૃંદાવનમાં આવેલા પ્રેમાનંદ મહારાજના આશ્રમમાં દેશ-વિદેશમાંથી મોટી સંખ્યામાં ભક્તો દર્શન કરવા માટે આવે છે. સામાન્ય લોકો ઉપરાંત ફિલ્મ અને રમત જગતની ઘણી જાણીતી હસ્તીઓ પણ સમયાંતરે મહારાજના આશીર્વાદ લેવા માટે અહીં પહોંચતી રહે છે. વિરાટ કોહલી અને અનુષ્કા શર્મા બાદ હવે જાણીતા ગાયક કુમાર સાનૂનો એક જૂનો વીડિયો ફરીથી સોશિયલ મીડિયા પર ચર્ચામાં આવ્યો છે. આ વીડિયોમાં કુમાર સાનૂ પ્રેમાનંદ મહારાજની સામે આ ગીત રજૂ કરતા જોવા મળે છે. જૂનો હોવા છતાં આ વીડિયો ફરી એકવાર સોશિયલ મીડિયા પર ઝડપથી વાયરલ થઈ રહ્યો છે.
આશ્રમમાં પહોંચ્યા બાદ એક શિષ્યએ કુમાર સાનૂનો પરિચય કરાવતા જણાવ્યું કે, તેમણે પોતાના લાંબા સંગીત કરિયરમાં 27 હજારથી વધુ ગીતો રેકોર્ડ કર્યા છે. ત્યારબાદ કુમાર સાનૂએ ખૂબ જ સરળ અને નમ્ર અંદાજમાં પ્રેમાનંદ મહારાજ સામે ફિલ્મ ‘જુર્મ’નું લોકપ્રિય ગીત ‘જબ કોઈ બાત બિગડ જાએ’ રજૂ કર્યું. ગીત પૂરું થયા પછી તેમણે હાથ જોડીને કહ્યું કે, તેઓ માત્ર મહારાજના આશીર્વાદ લેવા આવ્યા છે, જેથી આગળ પણ તેઓ પોતાનું કામ સંપૂર્ણ લગન અને ઈમાનદારીથી કરતા રહી શકે. પ્રેમાનંદ મહારાજે પણ કુમાર સાનૂને રસપૂર્વક સાંભળ્યા.
વર્ષ 1990માં રિલીઝ થયેલી ફિલ્મ ‘જુર્મ’નું આ રોમેન્ટિક ગીત આજે પણ હિન્દી સિનેમાના સૌથી લોકપ્રિય ગીતોમાં સામેલ છે. કહેવાય છે કે, આ ગીતની ધૂન અમેરિકન લોકગીત ‘500 Miles’થી પ્રેરિત હતી, પરંતુ ભારતીય સંગીત અને સુંદર શબ્દોએ તેને પોતાની અલગ ઓળખ અપાવી. આ ગીતને કુમાર સાનૂ અને સાધના સરગમે પોતાના મધુર અવાજથી યાદગાર બનાવ્યું હતું. જ્યારે તેના શબ્દો જાણીતા ગીતકાર ઇંદીવરએ લખ્યા હતા અને સંગીતકાર રાજેશ રોશને તેની ધૂન તૈયાર કરી હતી. મહેશ ભટ્ટના નિર્દેશનમાં બનેલી ફિલ્મ ‘જુર્મ’માં આ ગીત વિનોદ ખન્ના અને મીનાક્ષી શેષાદ્રી પર ફિલ્માવવામાં આવ્યું હતું. બંને કલાકારોની સુંદર જોડીએ આ રોમેન્ટિક ગીતને વધુ ખાસ બનાવી દીધું હતું. ત્રણ દાયકાથી વધુ સમય પસાર થયા બાદ પણ આ ગીત પ્રેમ, વિશ્વાસ અને સાથ નિભાવવાનું પ્રતીક માનવામાં આવે છે. આ જ કારણ છે કે આજે પણ આ ગીત જૂના સંગીત પ્રેમીઓની સાથે નવી પેઢીના લોકોની પ્લેલિસ્ટમાં પણ પોતાની જગ્યા જાળવી રાખે છે. પ્રેમાનંદ મહારાજ સામે કુમાર સાનૂએ આ યાદગાર ગીત રજૂ કરવું તેમના ચાહકો માટે એક ખાસ ભેટ સમાન બની રહ્યું છે.
કુમાર સાનૂ હિન્દી ફિલ્મ સંગીતના જાણીતા અને લોકપ્રિય ગાયકોમાંના એક છે. 90ના દાયકામાં તેમના મધુર અવાજે અનેક રોમેન્ટિક ગીતોને યાદગાર બનાવી દીધા હતા. તેમણે પોતાના લાંબા સંગીત કરિયરમાં હજારો ગીતો ગાયા છે અને બૉલિવૂડ સંગીતને એક અલગ ઓળખ આપી છે. કુમાર સાનૂને તેમના ખાસ અવાજ અને લાગણીસભર ગાયકી માટે અનેક એવોર્ડથી પણ સન્માનિત કરવામાં આવ્યા છે. આજે પણ તેમના ગીતો જૂની પેઢીની સાથે નવી પેઢીના લોકો પણ ખૂબ પસંદ કરે છે. પ્રેમાનંદ મહારાજ સામે તેમનું ગીત રજૂ કરવું તેમના ચાહકો માટે એક યાદગાર ક્ષણ બની રહી છે.
