મિતાલીનું વન-ડેમાં રાજ

મિતાલીનું વન-ડેમાં રાજ

મિતાલી રાજ

સાઉથ આફ્રિકા મહિલા ટીમ સામેની ચોથી વન-ડેમાં ગઈ કાલે ભારતીય મહિલા ક્રિકેટ ટીમની કૅપ્ટન મિતાલી રાજે વન-ડે ક્રિકેટમાં ૭૦૦૦ રન પૂરા કરીને વધુ એક રેકૉર્ડ પોતાના નામે નોંધાવ્યો હતો. આ કીર્તિમાન રચનારી વિશ્વની તે પ્રથમ મહિલા ક્રિકેટર બની છે. ગઈ કાલની મૅચ મિતાલીના કરીઅરની ૨૧૩મી મૅચ હતી, જેમાં ૨૬ રન બનાવવાની સાથે તેણે આ રેકૉર્ડ સ્થાપી દીધો હતો. તેણે કુલ ૭૦૧૯ રન ૧૯૨ ઇનિંગ્સમાં બનાવ્યા છે.

મિતાલી ગઈ કાલે પંચાવનમી હાફ સેન્ચુરી પાંચ રન માટે ચૂકી ગઈ હતી. સાઉથ આફ્રિકા સામેની વન-ડે સિરીઝની ત્રીજી મૅચમાં તેણે ૧૦,૦૦૦ ઇન્ટરનૅશનલ રન પૂરા કરવાનો પણ રેકૉર્ડ કર્યો હતો. આ પહેલાં મિતાલી વન-ડે ઇન્ટરનૅશનલમાં ૬૦૦૦ રન પૂરા કરનારી પહેલી મહિલા ક્રિકેટર બની હતી. મહિલા વન-ડે ક્રિકેટમાં મિતાલીના ૭૦૦૦ પ્લસ રન છે, પરંતુ બીજી કોઈ ખેલાડી ૬૦૦૦ રનના આંકડા સુધી પણ નથી પહોંચી શકી.