પોલૅન્ડમાં સોલર ફૅક્ટરીમાં ૧૦૦ ઘેટાંને નોકરીએ રાખવામાં આવ્યાં

ખુલ્લામાં બનેલા આ પ્લાન્ટને મેઇન્ટેન કરવા માટે પહેલાં અનેક મશીનો વપરાતાં હતાં, પણ હવે એ મશીનોની જગ્યાએ ૧૦૦ ઘેટાંને નોકરી આપવામાં આવી છે

આ ઘેટાંઓનું કામ છે પ્લાન્ટના મેદાનમાં ઊગી નીકળતું ઘાસ ખાવાનું

પોલૅન્ડના એક સોલર પાવરના પ્લાન્ટમાં ૩૧,૦૦૦થી વધુ સોલર પૅનલ્સ લાગેલી છે. ખુલ્લામાં બનેલા આ પ્લાન્ટને મેઇન્ટેન કરવા માટે પહેલાં અનેક મશીનો વપરાતાં હતાં, પણ હવે એ મશીનોની જગ્યાએ ૧૦૦ ઘેટાંને નોકરી આપવામાં આવી છે. આ ઘેટાંઓનું કામ છે પ્લાન્ટના મેદાનમાં ઊગી નીકળતું ઘાસ ખાવાનું. લાઇનબંધ લાગેલી સોલર પૅનલ્સની નીચે મેદાન હોવાથી અહીં ઘાસ ઊગી નીકળે છે. જો એને કાપવામાં ન આવે તો બેફામ ઘાસ ઊગી જાય અને અંદર જીવજંતુઓનો ફેલાવો વધી જાય. ઘાસ કાપવા માટે ઓછી હાઇટવાળાં મશીનો અને માણસોએ લગાતાર ખૂબ કામ કરવું પડે અને એનો ખર્ચ પણ સારોએવો થાય. એના બદલે કંપનીએ પૅનલના શેડમાં જ ૧૦૦ ઘેટાંઓને રાખી દીધાં છે. આ ઘેટાં ઘાસ ખાઈને એ ભાગને ચોખ્ખો પણ રાખે છે અને ઘેટાંઓને પોષણ સાથે મજાનો છાંયો મળી રહે છે. આ નૅચરલ અને સસ્ટેનેબલ ઑપ્શન છે.