25 May, 2026 02:38 PM IST | Bijnor | Gujarati Mid-day Online Correspondent
પ્રતીકાત્મક તસવીર (તસવીર સૌજન્યઃ એઆઇ)
ઉત્તર પ્રદેશ (Uttar Pradesh)ના બિજનોર (Bijnor)માં એક અત્યંત અજીબોગરીબ અને ચોંકાવનારી ઘટના સામે આવી છે, જે હાલ સોશિયલ મીડિયા (Social Media) પર ભારે ચર્ચાનો વિષય બની છે. સામાન્ય રીતે ચોરીના કિસ્સાઓમાં માણસો સામેલ હોય છે, પરંતુ આ ઘટનામાં એક કૂતરો આશરે `૧ લાખ` રૂપિયા જેટલી મોટી રકમની ચોરી કરતો જોવા મળ્યો છે. આ ઘટનાનો વીડિયો સોશ્યલ મીડિયા પર વાયરલ (Viral Video) થયો છે.
ઉત્તર પ્રદેશના બિજનોરમાં એક અજીબોગરીબ અને આશ્ચર્યજનક ઘટના સામે આવી છે. અહીં એક કૂતરો બાઇક પર લટકાવેલી ૧ લાખ રૂપિયા ભરેલી થેલી પોતાના મોઢામાં દબાવીને ભાગી ગયો હતો. જ્યારે આ ઘટનાના સીસીટીવી (CCTV) ફૂટેજ તપાસવામાં આવ્યા, ત્યારે જે દ્રશ્ય સામે આવ્યું તે જોઈને બધાના હોશ ઊડી ગયા હતા.
મળતી માહિતી મુજબ, દવાના વેપારી નવાબ અહેમદના ૧ લાખ રૂપિયા મસ્જિદ બહાર પાર્ક કરેલી એક બાઇકમાંથી ગાયબ થઈ ગયા હતા. પૈસા ગાયબ થતાં જ નવાબના પગ નીચેથી જમીન સરકી ગઈ હતી. તેણે આસપાસના લોકો પાસે પૂછપરછ શરૂ કરી, પરંતુ કોઈએ પણ બાઇકની નજીક કોઈ શંકાસ્પદ માણસને જોયો ન હતો.
ઘણા સમય સુધી પરેશાન રહ્યા બાદ, નવાબ અહેમદે નજીકમાં લગાવેલા સીસીટીવી કેમેરાના ફૂટેજ ચેક કર્યા. ફૂટેજ જોતાં જ અસલી રહસ્ય સામે આવ્યું. વીડિયોમાં દેખાયું કે એક કાળો કૂતરો બાઇક નજીક આવે છે, તે ખૂબ જ ચાલાકીથી પૈસા ભરેલી બેગને પોતાના મોઢામાં પકડે છે અને ત્યાંથી ચાલતો થાય છે.
આ સમગ્ર ઘટના શનિવારે બપોરે સિટી કોતવાલી વિસ્તારમાં આવેલી જૂની તહેસીલ નજીક `કિલા વાલી મસ્જિદ` બહાર બની હતી. પીડિત વેપારી નવાબ અહેમદે જણાવ્યું કે, તેઓ અને આસપાસના સ્થાનિક લોકો હાલમાં એ કૂતરા અને પૈસા ભરેલી થેલીને શોધી રહ્યા છે. આ મામલામાં કોઈ માણસ નહીં પણ એક જાનવર સામેલ હોવાને કારણે તેમણે પોલીસમાં હજુ સુધી કોઈ સત્તાવાર ફરિયાદ નોંધાવી નથી.
નઈ બસ્તીમાં આવેલા ચાહશીરીના બુખારા રોડ પર રહેતા નવાબ અહેમદ પશુઓની દવાઓનો મેડિકલ સ્ટોર ચલાવે છે. શનિવારે બપોરે તેઓ પોતાના ઘરેથી બાઇક લઈને નીકળ્યા હતા. તેમની પાસે કાળી પ્લાસ્ટિકની થેલીમાં વીંટાળેલી ૫૦૦-૫૦૦ રૂપિયાની બે નોટોની થપ્પીઓ હતી, જે કુલ ૧ લાખ રૂપિયા થતા હતા. નવાબ અહેમદના જણાવ્યા મુજબ, આ પૈસા તેમણે એક મિત્રને આપવાના હતા.
જ્યારે તેઓ ઘરથી આશરે ૮૦૦ મીટર દૂર જૂની તહેસીલ પાસે આવેલી `કિલા વાલી મસ્જિદ` નજીક પહોંચ્યા, ત્યારે ઝોહરની નમાજનો સમય થઈ ગયો હતો. તેમણે વિચાર્યું કે પહેલાં નમાજ પઢી લે અને પછી મિત્રના ઘરે જાય. આ ઉતાવળમાં તેઓ પૈસા ભરેલી થેલી બાઇક પર જ લટકાવીને મસ્જિદની અંદર જતા રહ્યા.
આશરે ૧૦ મિનિટ પછી જ્યારે નવાબ અહેમદ નમાજ પઢીને બહાર આવ્યા, ત્યારે બાઇક પર બેગ ન જોઈને તેઓ ચોંકી ગયા. તેમણે ત્યાં હાજર લોકો સાથે મળીને આસપાસના વિસ્તારમાં સતત ૪ કલાક સુધી ભારે શોધખોળ કરી, પરંતુ ક્યાંય પતો ન લાગ્યો. અતિશય ગરમી અને ચિંતાના કારણે તેમની તબિયત બગડવા લાગી, જેથી તેઓ ઘરે પરત ફર્યા. જ્યારે પરિવારને આ વાતની ખબર પડી, ત્યારે તેમના બાળકો અને અન્ય લોકો ઘટનાસ્થળે પહોંચ્યા અને ફરી શોધખોળ શરૂ કરી.
શોધખોળ દરમિયાન બાળકોનું ધ્યાન મસ્જિદની બહાર લગાવેલા સીસીટીવી (CCTV) કેમેરા પર ગયું. જ્યારે તેમણે ફૂટેજ ચેક કર્યા, ત્યારે ખબર પડી કે કોઈ માણસે નહીં પરંતુ એક કૂતરાએ આ ચોરી કરી છે. આ ખુલાસા પછી, પરિવારે નજીકની ઝાડીઓ, ગટરો અને અન્ય જગ્યાઓએ વધુ ચાર કલાક સુધી બેગ અને કૂતરાને શોધવાનો પ્રયત્ન કર્યો, પરંતુ કોઈ સફળતા મળી નહીં. આખરે થાકી-હારીને તેઓ ઘરે પાછા ફર્યા.
જોકે, ઇન્ટરનેટ પર વાયરલ થઈ રહેલી આ પોસ્ટમાં એવો દાવો કરવામાં આવી રહ્યો છે કે, કૂતરો થેલી તો લઈ ગયો પરંતુ તેણે એ લાખ રૂપિયા ક્યાં ફેંક્યા કે છુપાવ્યા છે, તેનો પતો હજુ સુધી લગાવી શકાયો નથી. આ અનોખી ચોરીનો સીસીટીવી ફૂટેજ જોયા પછી સોશિયલ મીડિયા પર લોકો ખૂબ જ રમુજી અને રસપ્રદ પ્રતિક્રિયાઓ આપી રહ્યા છે. સાથે જ, આ અનોખી ચોરીના વીડિયો વાયરલ થતા લોકો કૂતરાની વફાદારી પર પ્રશ્નો ઉઠાવી રહ્યાં છે.
