૧૨ વર્ષથી હીરો શોધવા અમેરિકાના પાર્કમાં ઘૂમતા માણસને મળ્યો ૯ કરોડનો ડાયમન્ડ

પાર્કમાં ૧૫ ડૉલર ભરીને તમે એન્ટ્રી લઈ શકો છો અને અહીં તમને એક બાલદી ભરીને પથ્થર વીણી શકો છો

૧૨ વર્ષથી જૅક પિરાડિન નામના ભાઈ અવારનવાર આ પાર્કમાં પોતાનું નસીબ અજમાવવા આવે છે

અમેરિકામાં આવેલા ક્રેટર ઑફ ડાયમન્ડ સ્ટેટ પાર્કમાં લોકો પોતાનું નસીબ અજમાવવા જતા હોય છે. આ પાર્ક હીરાની એવી ખાણ સમાન છે જ્યાંથી અનેક લોકોને દુર્લભ હીરા મળી ચૂક્યા છે. આ એ પાર્ક છે જ્યાં અમેરિકાનો સૌથી મોટો ૪૦ કૅરૅટનો હીરો મળી આવ્યો હતો જેનું નામ પાડવામાં આવ્યું હતું અંકલ સૅમ. આ પાર્કમાં ૧૫ ડૉલર ભરીને તમે એન્ટ્રી લઈ શકો છો અને અહીં તમને એક બાલદી ભરીને પથ્થર વીણી શકો છો. એમાંથી જો કોઈ હીરો નીકળે તો તમારાં નસીબ ઊઘડી ગયાં. ૧૨ વર્ષથી જૅક પિરાડિન નામના ભાઈ અવારનવાર આ પાર્કમાં પોતાનું નસીબ અજમાવવા આવે છે. અત્યાર સુધીમાં તેને ૩૦૦થી વધુ કીમતી કહેવાય એવા સ્ટોન્સ મળી ચૂક્યા છે જેની કિંમત લગભગ ૪ કરોડ રૂપિયા જેટલી થઈ ચૂકી છે. આ જ કારણોસર જૅકને હજી વધુ કંઈક કીમતી મળી જાય એવી આશા હોય છે. આ વખતે જૅકનું નસીબ કામ કરી ગયું અને તેને ૬ કૅરૅટનો પીળો હીરો મળ્યો છે. એની કિંમત લગભગ ૧૦ લાખ ડૉલર એટલે કે ૯ કરોડ રૂપિયા અંકાઈ રહી છે. ૧૯૭૨ની સાલથી અત્યાર સુધીમાં આ પાર્કમાંથી ૩૭,૦૦૦થી વધુ હીરા મળી ચૂક્યા છે.