૧૨,૦૦૦ કિલો ચૉકલેટ ભરેલી ટ્રક ચોરાઈ ગઈ

ઈસ્ટર પર્વમાં ચૉકલેટની ખૂબ ડિમાન્ડ રહે છે. જોકે આ ટ્રક રસ્તામાંથી જ ગાયબ થઈ ગઈ હતી

પ્રતીકાત્મક તસવીર

યુરોપમાં ઈસ્ટર પર્વની તૈયારીઓ ચાલી રહી છે ત્યારે હજારો કિલો ચૉકલેટની આખી ટ્રક ચોરાઈ જતાં હાહાકાર મચી ગયો છે. આ ચૉકલેટ ઇટલીથી પોલૅન્ડ જઈ રહી હતી. એમાં ૪ લાખથી વધુ ચૉકલેટ બાર હતા. ઈસ્ટર પર્વમાં ચૉકલેટની ખૂબ ડિમાન્ડ રહે છે. જોકે આ ટ્રક રસ્તામાંથી જ ગાયબ થઈ ગઈ હતી. ન તો એમાંની ચૉકલેટ ક્યાં ગઈ એની ખબર પડી કે ન એ ટ્રકનું શું થયું એની ખબર પડી. તહેવારોની સીઝનમાં આટલી મોટી માત્રામાં ચૉકલેટ ગાયબ થઈ જતાં પોલૅન્ડમાં એની અછત સર્જાઈ છે. જોકે આ ચૉકલેટ ક્યાંય પણ રૅપર સાથે વેચાવા નીકળશે તો એ પકડાઈ જશે. કંપનીનું કહેવું છે કે દરેક ચૉકલેટનાં રૅપર પર યુનિક બૅચ કોડ હોય છે. કંપનીએ ચોરાયેલી ચૉકલેટનો બૅચ કોડ જાહેર કરી દીધો છે. જો આ ચૉકલેટ કોઈ ડિપાર્ટમેન્ટલ સ્ટોરમાં વેચાવા આવશે તો ચોરનાર પકડાઈ જશે.