24 June, 2022 08:09 AM IST | Washington | Gujarati Mid-day Correspondent
ડેઇઝી બાર અને તેના મિત્રો
યુવતીઓના એક ગ્રુપે ઇઝીજેટ નામની ઍરલાઇન્સની ટિકિટ ખરીદી હતી, પરંતુ જ્યારે તેઓ વિમાનમાં પ્રવેશી ત્યારે એ નંબરની સીટો જ નહોતી. ડેઇઝી બાર અને તેના મિત્રોને વિમાનમાં ૨૬મી હરોળમાં સીટ ફાળવવામાં આવી હતી. જ્યારે તેઓ વિમાનમાં આગળ વધતાં-વધતાં પાછળની તરફ ગયાં તો ત્યાં માત્ર ખાલી જગ્યા હતી. હરોળમાં ૨૬ નંબર દેખાતો હતો, પરંતુ એકેય ખુરસી નહોતી.
ડેઇઝીએ પોતાની સાથે બનેલી આ ઘટનાનો ટિકટૉક વિડિયો બહાર પાડ્યો હતો, જેમાં યુવતીઓ પરેશાન અને અવાક્ હોય એવું દેખાય છે. આ ફુટેજ વાઇરલ થયું છે, જેમાં તેમના હાથમાં પાસપોર્ટ અને ટિકિટ છે. તેઓ બધા આ ઘટનાને કારણે આશ્ચર્યમાં છે. કેટલાક લોકોએ તેમને હેલ્પ પણ કરી છે. એક યુઝરે લખ્યું હતું કે અમને પણ આવો જ અનુભવ થયો હતો. કેટલાક યુઝરે આવી ઘટનાથી આઘાત પણ વ્યક્ત કર્યો હતો. એક વ્યક્તિએ કહ્યું કે વિમાનના પ્રવાસીઓને આ રીતે ઊભા રાખી ન શકાય. તેમણે કહ્યું કે વિમાનના કર્મચારીઓને ઓછા કરી શકાય. બીજી તરફ ઈઝીજેટના પ્રવક્તાએ કહ્યું કે ‘કેટલાંક વિમાનોમાં સીટની વ્યવસ્થામાં ફેરફાર કરવામાં આવ્યા હતા. આ મુસાફરોને નવી સીટ ફાળવવામાં આવી હતી અને તેઓ નિર્ધારિત સમયે જ પ્રવાસે ઊપડ્યા હતા.