૨૧ વર્ષ મહેનત કરીને ૧૩૦૦ સ્ક્વેર ફુટમાં બનાવ્યું આખું ન્યુ યૉર્ક

આ આર્ટકર્વ ૨૦૨૬ના ઑગસ્ટ સુધી ન્યુ યૉર્કમાં ૧૨૨૦ ફિફ્થ ઍવન્યુમાં આવેલા મ્યુઝિયમમાં જોવા મળશે

મિનિએચર વર્ઝન

એક કલાકાર અમેરિકાના ન્યુ યૉર્ક શહેરના એટલા પ્રેમમાં છે કે તેણે આખું શહેર, એની એક-એક ગલી અને ભૌગોલિક મૅચનું મિની વર્ઝન તૈયાર કર્યું છે. કલાકારનું નામ છે જોસેફ મૅકેન. આમ તો જોસેફ ટ્રક-ડ્રાઇવર છે, પરંતુ તેની ડ્રાઇવિંગની કામગીરી દરમ્યાન તેણે શહેરને એટલું ધમરોળ્યું હતું કે હવે એની ગલી-ગલીનો નકશો તેના દિલમાં ઊતરી ગયો છે. આ નકશાના આધારે ૧૩૦૦ સ્ક્વેર ફુટમાં જોસેફે એક એવું ન્યુ યૉર્કનું મૉડલ તૈયાર કર્યું છે જેને જાણે તમે વિમાનમાંથી ઉપરથી ન્યુ યૉર્ક શહેરની સફર કરી રહ્યા હો એવો ભાસ કરાવે છે. એ માટે જોસેફે માત્ર લાકડીનો ઉપયોગ કર્યો છે. શહેરના ચોક્કસ ભાગોમાં જેવી ઇમારતો છે લગભગ હૂબહૂ એવી જ ઇમારતોનું મિનિએચર વર્ઝન લાકડાંમાંથી તૈયાર કર્યું છે. એના પર ઍક્રિલિક પેઇન્ટથી રંગ આપવામાં આવ્યો છે. ન્યુ યૉર્ક શહેરમાં લગભગ ૧૦ લાખથી વધુ બિલ્ડિંગો છે અને જોસેફે આ તમામ બિલ્ડિંગોનું મિની વર્ઝન લાકડાંથી બનાવ્યું છે. આ કામ એટલું લાંબું ચાલ્યું કે તેને આખો પ્રોજેક્ટ પૂરો કરતાં ૨૧ વર્ષ લાગ્યાં હતાં. જોસેફે જ્યારે આ શહેરનું આર્ટવર્ક બનાવવાનું શરૂ કર્યું ત્યારથી અત્યાર સુધીમાં શહેરમાં ઘણાબધા બદલાવ આવી ગયા છે. જોસેફે એ તમામ બદલાવોની સાથે પોતાના આર્ટવર્કને સતત મૉડિફાય કર્યું હતું. અત્યારે હવે આ જાયન્ટ આર્ટવર્ક જોવું હોય તો ન્યુ યૉર્કના મ્યુઝિયમમાં એને મૂકવામાં આવ્યું છે. ૫૦X૨૭ ફુટના આ મૉડલને ૩૨૦ સેક્શનમાં તૈયાર કરવામાં આવ્યું છે. એમાં ન્યુ યૉર્કની જાણીતી જગ્યાઓથી લઈને પાડોશી શહેરો વેસ્ટચેસ્ટર, લૉન્ગ આઇલૅન્ડ અને ન્યુ જર્સીનો કેટલોક ભાગ પણ બનાવ્યો છે.

આ આર્ટકર્વ ૨૦૨૬ના ઑગસ્ટ સુધી ન્યુ યૉર્કમાં ૧૨૨૦ ફિફ્થ ઍવન્યુમાં આવેલા મ્યુઝિયમમાં જોવા મળશે. આ મ્યુઝિયમ વીકના સાતેસાત દિવસ ચાલુ રહે છે. ૧૮ વર્ષથી નાની વયના લોકો માટે ફ્રી એન્ટ્રી છે અને પુખ્તો માટે એન્ટ્રી-ફી ૨૦૦૦ રૂપિયા છે.