રાહુલ ગાંધીને ખોટા પાડ્યા એક મતદારે

કૉન્ગ્રેસના નેતાએ જે વ્યક્તિના નામે અલગ-અલગ રાજ્યોમાં વોટર-આઇડી હોવાનો દાવો કર્યો એ ભાઈએ કહ્યું કે હું અલગ-અલગ રાજ્યોમાં શિફ્ટ થયો છું અને મતદાર એક જ છું, કંઈક તો સમજો

રાહુલ ગાંધીએ આદિત્ય શ્રીવાસ્તવ નામની વ્યક્તિ ચાર રાજ્યમાં મતદાર હોવાનો દાવો કર્યો હતો.

ગુરુવારે રાહુલ ગાંધીએ કર્ણાટકમાં પ્રેસ-કૉન્ફરન્સ યોજીને ઇલેક્શન કમિશન દ્વારા કથિત રીતે BJPને જિતાડવા વોટ-ચોરી કરવામાં આવી રહી હોવાનો આરોપ મૂક્યો હતો. આ કૉન્ફરન્સમાં તેમણે કેટલીક વિગતો આપી હતી કે કેવી રીતે આ વોટ-ચોરી થાય છે. રાહુલ ગાંધીએ આ કૉન્ફરન્સમાં આદિત્ય શ્રીવાસ્તવ નામના મતદારનો ઉલ્લેખ કર્યો હતો કે આ એક જ નામનો મતદાર લખનઉમાં, મુંબઈમાં અને બે વાર કર્ણાટકમાં એમ ચાર જગ્યાએ જોવા મળે છે.

જોકે રાહુલ ગાંધીના આ દાવાની પોલ ગઈ કાલે આદિત્ય શ્રીવાસ્તવે પોતે મીડિયા સામે આવીને ખોલી હતી. આદિત્યએ કહ્યું હતું કે ‘રાહુલ ગાંધીને કોઈ અધિકાર નથી તેમની પ્રાઇવેટ ડિટેઇલ્સ આ રીતે જાહેર કરે. હું પોતે લખનઉનો રહેવાસી છું. નોકરી માટે ૨૦૧૬માં મુંબઈ હતો ત્યારે મેં મારું વોટર-આઇડી ઇલેક્શન કમિશનની સત્તાવાર વેબસાઇટ પરથી મુંબઈ શિફ્ટ કરાવ્યું હતું. ૨૦૨૧થી હું નોકરી માટે બૅન્ગલોરમાં રહું છું એટલે ત્યારથી વોટર-આઇડી અહીં શિફ્ટ કરવાથી હું અહીં મતદાન કરું છું. મેં દરેક ચૂંટણીમાં એક-એક વાર જ મત આપ્યો છે. મારો વોટર-આઇડી નંબર તો પહેલાંથી એક જ છે. આરોપો મૂકતાં પહેલાં કંઈક તો સમજો.’