08 September, 2025 09:58 PM IST | New Delhi | Gujarati Mid-day Online Correspondent
સોનિયા અને રાહુલ ગાંધી (તસવીર: મિડ-ડે)
ભારતીય જનતા પાર્ટી (ભાજપ) ના નેતા અમિત માલવિયાએ સોમવારે ગોવાના મંત્રી વિશ્વજીત રાણેના પોડકાસ્ટ ઇન્ટરવ્યુની ક્લિપ શૅર કરી અને કૉંગ્રેસ પાર્ટી અને વિપક્ષના નેતા રાહુલ ગાંધી પર જોરદાર શાબ્દિક પ્રહાર કર્યા હતા. વીડિયો શૅર કરીને અમિત માલવિયાએ લખ્યું કે “ગોવાના આરોગ્ય મંત્રી વિશ્વજીત રાણે, જે અગાઉ કૉંગ્રેસમાં હતા, તેમણે દાવો કર્યો છે કે એકવાર રાહુલ ગાંધી રૂમમાં પ્રવેશ્યા અને તેમના પિતા, પ્રમોદ રાણે (કૉંગ્રેસના વરિષ્ઠ નેતા અને ગોવાના સાત વખતના મુખ્ય પ્રધાન) ની હાજરીમાં સોનિયા ગાંધી પર બૂમો પાડવા લાગ્યા હતા.”
અમિત માલવિયા દ્વારા શૅર કરાયેલી ક્લિપમાં, વિશ્વજીત રાણે કહે છે કે એકવાર તેમના પિતાએ રાહુલ ગાંધીને ‘મેડમ’ (સોનિયા ગાંધી) પર બૂમો પાડતા જોયા હતા. પછી યજમાન સ્પષ્ટ કરે છે કે શું તેનો અર્થ રાહુલ સોનિયા ગાંધી પર બૂમો પાડી રહ્યા હતા, અને વિશ્વજીત જવાબમાં ‘હા’ પાડે છે. પછી તે રાહુલ ગાંધીની ટીકા કરે છે અને કહે છે, "જો તે પોતાની માતાનો આદર ન કરી શકે, તો તેઓ ભારત માતા માટે શું કરશે?"
જ્યારે યજમાન પૂછે છે કે રાહુલ ગાંધી સામાજિક મેળાવડામાં તેમની માતા સાથે આદરપૂર્વક વર્તન કરે છે, ત્યારે ભાજપના મંત્રી જવાબ આપે છે કે, "જાહેરમાં આદર આપવો અને ઘરે આદર આપવો એ બે અલગ અલગ બાબતો છે."
રાહુલ ગાંધીના કેટલાક આરોપોથી વિવાદ
પટણામાં મતદાર અધિકાર રૅલી દરમિયાન રાહુલ ગાંધીએ કહ્યું, "અમે ભાજપને બંધારણનો નાશ કરવા દઈશું નહીં. તેથી જ અમે આ યાત્રા કાઢી છે અને જનતાએ અમને જબરદસ્ત સમર્થન આપ્યું છે." તેમણે કહ્યું કે બિહારના લોકોએ મહાગઠબંધનને ટેકો આપ્યો હતો અને નારા લગાવ્યા હતા – ‘વોટ ચોર-ગદ્દી છોડ’. રાહુલે કટાક્ષ કર્યો કે આ નારા હવે ચીન સુધી ગુંજાઈ રહ્યા છે, જ્યાં વડા પ્રધાન મોદી SCO સમિટમાં ભાગ લેવા ગયા હતા. કૉંગ્રેસના સાંસદ રાહુલ ગાંધીએ ભાજપ અને ચૂંટણી પંચ પર મતદાર યાદીમાંથી નામો કાઢી નાખવાનો આરોપ પણ લગાવ્યો હતો. રાહુલ ગાંધીએ ભાજપ પર બંધારણની હત્યા કરવાનો આરોપ લગાવ્યો હતો અને કહ્યું હતું કે બિહારના લોકો મહાગઠબંધનની સાથે છે.