હાથમાં સંવિધાન લઈને ખુલ્લા પગે કર્ણાટકના મુખ્ય પ્રધાનપદના શપથ લીધા ડી. કે. શિવકુમારે

નાયબ મુખ્ય પ્રધાન બન્યા જી. પરમેશ્વર, ભૂતપૂર્વ મુખ્ય પ્રધાન સિદ્ધારમૈયાના દીકરા સહિત ૧૨ પ્રધાનોએ પણ લીધા શપથ

ડી. કે. શિવકુમાર

બુધવારે બપોરે બૅન્ગલોરના લોકભવનમાં ૬૪ વર્ષના ડી. કે. શિવકુમારે કર્ણાટકના ચોવીસમા મુખ્ય પ્રધાન તરીકે શપથ લીધા હતા. શપથ સમારોહમાં પહોંચીને પહેલાં જ તેમણે સંતોના આશીર્વાદ લીધા હતા. શપથ લેવા માટે શિવકુમાર ખુલ્લા પગે સ્ટેજ પર આવ્યા હતા અને તેમણે હાથમાં સંવિધાનની એક કૉપી રાખી હતી. નવા ડેપ્યુટી ચીફ મિનિસ્ટરપદ માટે જી. પરમેશ્વરે શપથ લીધા હતા. આ ઉપરાંત અન્ય ૧૨ વિધાનસભ્યોએ પણ પ્રધાનપદના શપથ લીધા હતા. એમાં ભૂતપૂર્વ મુખ્ય પ્રધાન સિદ્ધારમૈયાનો દીકરો યતીન્દ્ર સિદ્ધારમૈયા પણ સામેલ હતો.

નવી કૅબિનેટમાં કૉન્ગ્રેસના રાષ્ટ્રીય અધ્યક્ષ મલ્લિકાર્જુન ખડગેનો દીકરો પ્રિયાંક પણ સામેલ છે. શપથગ્રહણ સમારોહમાં રાહુલ ગાંધી અને મલ્લિકાર્જુન ખડગે હાજર રહ્યા હતા.

શિવકુમાર ભારતના સૌથી અમીર મુખ્ય પ્રધાન 

કર્ણાટકના મુખ્ય પ્રધાન બન્યા પછી હવે શિવકુમાર ૧૪૧૩ કરોડ રૂપિયાની સંપત્તિ સાથે ભારતના સૌથી અમીર મુખ્ય પ્રધાનની યાદીમાં ટોચના સ્થાને પહોંચી ગયા છે. બીજા નંબરે એન. ચંદ્રાબાબુ નાયડુ છે જેમની સંપત્તિ ૯૩૬ કરોડ રૂપિયા છે. ત્રીજા અમીર મુખ્ય પ્રધાન છે તામિલનાડુના વિજય, જેની સંપત્તિ છે ૬૪૦ કરોડ રૂપિયા.