04 April, 2026 08:27 AM IST | Ayodhya | Gujarati Mid-day Correspondent
પ્રતીકાત્મક ફાઇલ તસવીર
અયોધ્યામાં બુરખો પહેરીને પાયલ નામની પચીસ વર્ષની હિન્દુ યુવતીએ જ્વેલરીની દુકાનમાં લૂંટ ચલાવી હતી. તેણે તેના ૨૭ વર્ષના બૉયફ્રેન્ડ રાહુલ સાથે મળીને ગુનો કર્યો હતો. પોલીસે ગુરુવારે મોડી રાત્રે બન્નેની ધરપકડ કરી હતી. આ ઘટના સમયે રાહુલ જ્વેલરીની દુકાનથી થોડે દૂર તેની બાઇક સાથે ઊભો હતો. પાયલે રમકડાની પિસ્તોલ બતાવીને ૩.૬ લાખ રૂપિયાની કિંમતના સોનાના હાર અને ચેઇનની ચોરી કરી હતી. ત્યાર બાદ તે રાહુલ પાસે દોડી ગઈ હતી અને બાઇક પર તેની સાથે ભાગી ગઈ હતી.
પોલીસે જણાવ્યું હતું કે આ કેસ માટે પાંચ ટીમ બનાવવામાં આવી હતી. ૬૦ CCTV કૅમેરાનાં ફુટેજ ચકાસીને રાહુલની બાઇકનો નંબર ટ્રેસ કરવામાં આવ્યો હતો અને એના આધારે બન્નેની ધરપકડ કરવામાં આવી હતી.
પાયલનાં લગ્ન ગયા વર્ષે પાંચ એપ્રિલે થયાં હતાં. તે ૪ મહિનાની ગર્ભવતી છે અને તેના પતિ સાથે પંજાબમાં રહેતી હતી. તે ૧૬ એપ્રિલે તેની ઇન્ટરમીડિયેટ પરીક્ષા આપવા માટે અયોધ્યામાં તેનાં મમ્મી-પપ્પાના ઘરે આવી હતી. પાયલના પિતા રામ નવલે કહ્યું હતું કે ‘તે ગુરુવારે ઘરેથી એમ કહીને નીકળી ગઈ હતી કે તે તાવીજ બનાવવા જઈ રહી છે. તેની તબિયત વારંવાર બગડતી રહે છે. તેણે આવું કેમ કર્યું એની અમને ખબર નથી.
