29 July, 2026 07:36 AM IST | Mumbai | Gujarati Mid-day Correspondent
ખોપોલીના ઝેનિથ વૉટરફૉલ ખાતે ફસાઈ ગયેલા ટૂરિસ્ટ.
ખોપોલીના ઝેનિથ વૉટરફૉલમાં મંગળવારે મજા માણવા ગયેલા ૧૦૦ ટૂરિસ્ટ્સ સવારે ૧૦ વાગ્યાની આસપાસ ભારે વરસાદના કારણે ફસાઈ ગયા હતા. અચાનક જ આ વિસ્તારમાં વરસાદનું જોર વધતાં આસપાસ વહેતાં ઝરણાંઓમાં પાણીનું સ્તર વધી ગયું હતું અને વહેણ પણ જોખમી બની જતાં તેઓ ફસાઈ ગયા હોવાની માહિતી મળી હતી.
આ ઘટનાની માહિતી મળતાં જ ફાયરબ્રિગેડ, પોલીસ, સ્થાનિક રહેવાસીઓ અને અમુક સ્વયંસેવકોની મદદથી તેમને બચાવવા માટે રેસ્ક્યુ ઑપરેશન હાથ ધરાયું હતું. લગભગ ત્રણ કલાક પ્રયાસ કર્યા બાદ બધા જ ટૂરિસ્ટોને બચાવી લેવાયા હતા.
અધિકારીઓએ જણાવ્યા મુજબ બધા જ ટૂરિસ્ટ્સ સવારે ૭ વાગ્યાની આસપાસ ત્યાં પહોંચ્યા હતા. જોકે ૧૦ વાગ્યા સુધીમાં ધોધમાર વરસાદ પડતાં તેઓ ત્યાં ફસાઈ ગયા હતા અને જે રસ્તેથી આવ્યા હતા અે રસ્તેથી જવું શક્ય નહોતું. જોકે ૩ કલાકના રેસ્ક્યુ ઑપરેશન બાદ બધાને સુરિક્ષત રીતે બચાવી લેવાયા હતા.
