મુંબઈ એરપોર્ટ જવાના છો? તો આ એડવાઇઝરી વાંચી લેજો…ભારે વરસાદને પગલે પ્રશાસને લીધો નિર્ણય

Mumbai Rains Updates: એરપોર્ટ તરફથી એક નિવેદનમાં કહેવામાં આવ્યું છે કે, મુસાફરો એરપોર્ટ પર જતા પહેલા તેમની ફ્લાઇટ્સની સ્થિતિ તપાસે

પ્રતીકાત્મક ફાઇલ તસવીર

મુંબઈ (Mumbai) વરસાદનું જોર વધી રહ્યું છે. અનેક ઠેકાણે પાણી ભરાયાં છે. તો શાળા-કોલેજોમાં રજા આપવામાં આવી છે. ટ્રેનવ્યવહાર અને વાહનવ્યવહાર પણ ખોરવાયો છે. ત્યારે વરસાદના વધતા જોરને (Mumbai Rains Updates) ધ્યાનમાં રાખીને મુંબઈ એરપોર્ટ (Mumbai Airport) દ્વારા મુસાફરો માટે એડવાઇઝરી જાહેર કરવામાં આવી છે. જેમાં મુસાફરોને મુસાફરી કરતા પહેલા ફ્લાઇટ્સની પરિસ્થિતિ ચકાસી લેવાનું કહેવામાં આવ્યું છે.

મુંબઈમાં છેલ્લા ત્રણ દિવસથી અવિરત વરસાદ પડી રહ્યો છે, ત્યારે છત્રપતિ શિવાજી મહારાજ આંતરરાષ્ટ્રીય વિમાનમથક (Chhatrapati Shivaji Maharaj International Airport)એ મુસાફરોને ફ્લાઇટમાં વિલંબ થવાની સંભાવના અંગે ચેતવણી આપતી એક પેસેન્જર એડવાઇઝરી જારી કરી છે. શિવાજી મહારાજ આંતરરાષ્ટ્રીય વિમાનમથક (CSMIA) તરફથી એક નિવેદનમાં કહેવામાં આવ્યું છે કે, ‘ખરાબ હવામાન અને ભારે વરસાદની આગાહીને કારણે, મુસાફરોને વિનંતી કરવામાં આવે છે કે તેઓ એરપોર્ટ પર જતા પહેલા તેમની ફ્લાઇટ્સની સ્થિતિ તપાસવા માટે તેમની સંબંધિત એરલાઇન્સનો સંપર્ક કરે.’

સોમવારે, એરપોર્ટ પર રનવે પર ઓછી દૃશ્યતાને કારણે નવ ગો-અરાઉન્ડ અને એક ફ્લાઇટ ડાયવર્ઝન નોંધાયું હતું, એમ સૂત્રોએ જણાવ્યું હતું. ડાયવર્ઝન કરાયેલી ફ્લાઇટ ઇન્ડિગો (Indigo) ફ્લાઇટ 6E6468 (ટેલ નંબર VT-IIJ) અમદાવાદથી મુંબઈ (Ahmedabad to Mumbai) જતી હતી, જેને સવારે ૧૦.૦૭ વાગ્યે ઉડાન ભરી હતી અને હવામાનની સ્થિતિને કારણે મુંબઈમાં ઉતરાણ કરી શકી ન હતી, જેના કારણે સુરત (Surat)માં સવારે ૧૧.૩૫ વાગ્યે લેન્ડ થઈ હતી. અત્યાર સુધી એરપોર્ટ પર કોઈ મોટો વિલંબ થયો નથી, પરંતુ જો ભારે વરસાદ ચાલુ રહેશે તો અધિકારીઓને અવરોધો થવાની અપેક્ષા છે.

સોશ્યલ મીડિયા પ્લેટફોર્મ એક્સ (X)ના પર CSMIAના નિવેદનમાં ઉમેરવામાં આવ્યું છે, ‘મુસાફરોને સુરક્ષા પ્રક્રિયા માટે પૂરતો સમય સુનિશ્ચિત કરવા માટે સામાન્ય કરતાં વહેલા એરપોર્ટ પર પહોંચવાની સલાહ આપવામાં આવે છે.’

એરપોર્ટ એડવાઇઝરી ઉપરાંત, મુંબઈમાં ભારે વરસાદ તેમજ પાણી ભરાવા અને ટ્રાફિક ખોરવાવાની સ્થિતિ વચ્ચે, ઈન્ડિગો (IndiGo) અને અકાસા એર (Akasa Air) દ્વારા અલગ-અલગ એડવાઇઝરીમાં મુસાફરોને તેમની મુસાફરીનું આયોજન કરવા અને ફ્લાઇટની સ્થિતિ અગાઉથી તપાસવા વિનંતી કરવામાં આવી છે.

શહેરમાં પાણી ભરાઈ જવાની સ્થિતિને ટાંકીને, બંને એરલાઈન્સે તેમના સત્તાવાર X હેન્ડલ પર મુસાફરોને ફ્લાઇટની સ્થિતિ તપાસવા અને અગાઉથી આયોજન કરવાની સલાહ આપી હતી.

એડવાઈઝરીમાં, ઈન્ડિગોએ માહિતી આપી હતી કે મુખ્ય એરપોર્ટ રૂટ પર પાણી ભરાઈ જવાની જાણ કરવામાં આવી છે, જેના કારણે વિલંબ થઈ શકે છે. ‘જો તમે એરપોર્ટ પર મુસાફરી કરી રહ્યા છો, તો અમે તમને આગળની યોજના બનાવવા અને બહાર નીકળતા પહેલા અમારી એપ અને વેબસાઇટ પર તમારી ફ્લાઇટની સ્થિતિ તપાસવા માટે પ્રોત્સાહિત કરીએ છીએ.’

ઇન્ડિગોએ એમ પણ કહ્યું કે તેની ટીમો મુસાફરોને દરેક રીતે ટેકો આપવા માટે કામ કરી રહી છે.

અકાસા એર દ્વારા X પર પોસ્ટ કરવામાં આવી હતી જેમાં કહેવામાં આવ્યું હતું કે, ‘મુંબઈ, બેંગલુરુ, ગોવા અને પુણેના કેટલાક ભાગોમાં એરપોર્ટ રૂટ પર ધીમો ટ્રાફિક અને ભીડનો અનુભવ થઈ શકે છે. મુસાફરીનો અનુભવ સરળ બનાવવા માટે, અમે તમને વિનંતી કરીએ છીએ કે તમે તમારી ફ્લાઇટ માટે સમયસર એરપોર્ટ પહોંચવા માટે વધારાના મુસાફરી સમયનું આયોજન કરો. કૃપા કરીને તમારી ફ્લાઇટની સ્થિતિ તપાસો.’

નોંધનીય છે કે, મુંબઈ અને ઉપનગરમાં છેલ્લા કેટલાક દિવસોથી ભારે વરસાદ પડી રહ્યો છે. જેના કારણે ભારે પાણી ભરાઈ ગયા છે અને ટ્રાફિક જામ થઈ ગયો છે. આજે શહેર અને ઉપનગરમાં રેડ એલર્ટ (Red Alert) જાહેર કરવામાં આવ્યું છે.