28 June, 2026 07:50 AM IST | Mumbai | Gujarati Mid-day Correspondent
સેલમાં એક જ રૂપિયામાં કપડાં લેવા સેંકડોની સંખ્યામાં યુવક-યુવતીઓ ઇન્ફિનિટી મૉલ પહોંચી ગયાં હતાં.
મલાડ-વેસ્ટના ઇન્ફિનિટી મૉલમાં આવેલા કપડાંના એક શોરૂમ દ્વારા એક રૂપિયામાં કપડાંના સેલની જાહેરાતનો વિડિયો યંગસ્ટર્સમાં દાવાનળની જેમ ફરી વળતાં સેંકડોની સંખ્યામાં યુવકો-યુવતીઓ ગઈ કાલે એ સેલમાં પહોચી ગયાં હતાં. જોકે જાહેરાતમાં એમ કહેવાયું હતું કે વહેલો તે પહેલોના ધોરણે સૌથી પહેલાં જે ૧૦૦થી ૧૨૫ ગ્રાહકો આવશે તેમને એ ઑફરનો લાભ મળી શકશે. એથી સવારથી જ મૉલની બહાર યુવકો-યુવતીઓ ભેગાં થવા માંડ્યાં હતાં. થોડી જ વારમાં એટલી બધી ભીડ થઈ ગઈ કે પરિસ્થિતિ આઉટ ઑફ કન્ટ્રોલ થઈ ગઈ હતી એટલે આખરે પોલીસે દરમ્યાનગીરી કરવી પડી હતી.
મૉલના સિક્યૉરિટી સ્ટાફે ભીડને કન્ટ્રોલ કરવાની કોશિશ કરી હતી. એમ છતાં ભીડ વધતી જતી હતી. ભીડ જોઈને એ જાહેરાત કરનાર દુકાનના કર્મચારીઓએ દુકાનનું શટર જ ઓપન કર્યું નહોતું.
પોલીસે ત્યાં પહોંચીને ગિરદીને મૅનેજ કરી હતી. દુકાનના સ્ટાફ દ્વારા ત્યાર બાદ સેલ નહીં થાય એવી વારંવાર જાહેરાત કર્યા પછી પોલીસે પણ ભેગાં થયેલાં યુવકો-યુવતીઓને સમજાવ્યાં હતાં અને ત્યાંથી નીકળી જવા કહ્યું હતું. એ પછી મેદની વિખેરાઈ ગઈ હતી. પોલીસનું કહેવું હતું કે એ દુકાનની સામે જ યુવકો-યુવતીઓએ ગિરદી કરી હતી. બાકી આખા મૉલમાં એટલી ગિરદી નહોતી.
