07 May, 2023 03:13 PM IST | New Delhi | Gujarati Mid-day Online Correspondent
ફાઇલ તસવીર
જનરેટિવ આર્ટિફિશિયલ ઇન્ટેલિજન્સ (Artificial Intelligence) આ વર્ષે એક બઝવર્ડ બની ગયું છે, જેમાં ચેટજીપીટી (ChatGPT) જેવી એપ્સ લોકોને ખૂબ જ આકર્ષી રહી છે. AI ચેટબોટ્સ વિવિધ કાર્યો માટે સક્ષમ છે, ત્યારે તેનો દુરુપયોગ થવાની આશંકા પણ છે. એવી પણ ચિંતા છે કે AI લાખો નોકરીઓ છીનવી લેશે અને એલન મસ્ક સહિત ઘણા ટેક ઉદ્યોગસાહસિકોએ તેના ફેલાવા સામે અવાજ ઉઠાવ્યો છે. હવે, અબજોપતિ રોકાણકાર અને બર્કશાયર હેથવેના CEO, વૉરેન બફેટે (Warren Buffett) પણ ઝડપથી વિકસતી આ ટેક્નોલોજી પર તેમના વિચારો રજૂ કર્યા છે.
ઓમાહા, નેબ્રાસ્કામાં કંપનીની વાર્ષિક મીટિંગમાં ચર્ચા દરમિયાન, બફેટે શક્તિશાળી ટેક્નોલોજીના નિર્માણની તુલના એટમ બોમ્બ સાથે કરી હતી. તેવો અહેવાલ ન્યૂયોર્ક પોસ્ટે આપ્યો છે.
થોડા સમય પહેલા જ બફેટને ચેટજીપીટી અજમાવવાની તક મળી. તેમના મિત્ર બિલ ગેટ્સે તેમને તે બતાવ્યું હતું. બફેટ તેની વિશાળ ક્ષમતાઓથી પ્રભાવિત થયા હતા, ત્યારે તેમણે કહ્યું હતું કે તેઓ આ ટેક્નોલોજી વિશે ચિંતિત છે.
92 વર્ષીય રોકાણકારે જણાવ્યું હતું કે, “જ્યારે કોઈ વસ્તુ તમામ પ્રકારની વસ્તુઓ કરી શકે છે, ત્યારે મને થોડી ચિંતા થાય છે. કારણ કે હું જાણું છું કે આપણે આ શોધને નકારી શકીશું નહીં અને તમે જાણો છો કે આપણે બીજા વિશ્વયુદ્ધમાં અણુ બોમ્બની શોધ ખૂબ જ સારા કારણોસર કરી હતી.” આ બેઠકમાં બર્કશાયર હેથવેના વાઇસ ચેરમેન ચાર્લી મુંગરે પણ હાજરી આપી હતી.
તેમણે ઉમેર્યું કે, “આપણે આમ કર્યું તે ખૂબ જ મહત્વપૂર્ણ હતું, પરંતુ શું તે વિશ્વના આગામી બસો વર્ષ માટે સારું છે કે આમ કરવાની ક્ષમતા બહાર પાડવામાં આવી છે?" તેમણે આગળ કહ્યું કે, “હું માનું છું કે AI દુનિયામાં દરેક વસ્તુને બદલી નાખશે, સિવાય કે માણસો કેવી રીતે વિચારે છે અને વર્તે છે.”
આ પણ વાંચો: હવે નહીં કરી શકાય બીમારીનું ખોટું બહાનું, AI ખોલશે ભેદ...જાણો કેવી રીતે કરશે કામ
તાજેતરમાં, જ્યોફ્રી હિન્ટન જેમને ‘AIના ગોડફાધર્સ’ તરીકે ઓળખવામાં આવે છે, તેમણે પણ સમાન ચિંતા વ્યક્ત કરી હતી. તેમણે કહ્યું હતું કે આર્ટિફિશિયલ ઇન્ટેલિજન્સ આબોહવા પરિવર્તન કરતાં માનવતા માટે વધુ તાકીદનું જોખમ ઊભું કરી શકે છે. તેમણે બીબીસીને એમ પણ કહ્યું કે ચેટબોટ્સ ટૂંક સમયમાં માનવ મગજ ધરાવે છે તે માહિતીના સ્તરને વટાવી શકે છે.