02 April, 2026 02:36 PM IST | Iran | Gujarati Mid-day Correspondent
ડોનલ્ડ ટ્રમ્પ
વેસ્ટ એશિયામાં ચાલી રહેલો સંઘર્ષ દિવસે ને દિવસે વધુ ખતરનાક બની રહ્યો છે ત્યારે અમેરિકાના પ્રેસિડન્ટ ડોનલ્ડ ટ્રમ્પે એક મોટું નિવેદન બહાર પાડતાં કહ્યું હતું કે ‘ઈરાનમાં ચાલી રહેલી અમેરિકન લશ્કરી કાર્યવાહી ખૂબ જ ટૂંક સમયમાં સમાપ્ત થઈ જશે. અમેરિકા એના સૈનિકોને આગામી બેથી ત્રણ અઠવાડિયાંમાં પાછા ખેંચી શકે છે. અમેરિકાએ લગભગ પોતાનું લક્ષ્ય પ્રાપ્ત કરી લીધું છે અને ઈરાન સાથે વાટાઘાટો ચાલુ છે. અમારું પ્રશાસન ઈરાન સાથે વાટાઘાટો કરી રહ્યું છે, પરંતુ લશ્કરી કાર્યવાહી પણ ચાલુ છે.’
વાઇટ હાઉસ ખાતે એક કાર્યક્રમ દરમ્યાન પોતાના નિવેદનમાં ટ્રમ્પે વધુમાં જણાવ્યું હતું કે ‘હોર્મુઝ સ્ટ્રેટમાંથી તેલ અને ગૅસ આયાત કરે છે એવા ફ્રાન્સ અથવા ચીન જેવા અન્ય દેશોએ હવે પોતાનું રક્ષણ જાતે કરવું પડશે. અમેરિકા ત્યાં અન્ય કોઈ પણ બાબતમાં સામેલ થશે નહીં. અમેરિકાએ કટ્ટરપંથી અને ખતરનાક વ્યક્તિઓનો નાશ કર્યો છે અને આ પ્રદેશ હવે પ્રમાણમાં સુરક્ષિત છે.’
ઈંધણના વધતા ભાવ અંગેના પ્રશ્નના જવાબમાં ટ્રમ્પે કહ્યું હતું કે ‘અમેરિકા ઈરાનમાંથી સૈનિકો પાછા ખેંચતાંની સાથે જ પરિસ્થિતિમાં સુધારો થશે અને તેલના ભાવ પણ ઘટી શકે છે. અમેરિકાએ એનું કાર્ય લગભગ પૂરું કરી લીધું છે અને આગામી બે અઠવાડિયાંમાં સૈનિકો પાછા ખેંચી લેશે તથા ઑપરેશન સમાપ્ત કરશે.’
