ઇઝરાયલ અને હમાસ દ્વારા યુદ્ધવિરામ લંબાવવામાં આવ્યું

હમાસે પણ યુદ્ધવિરામ લંબાવવા માટેની તૈયારી બતાવી હતી

ગાઝામાં ૫૧ દિવસથી આતંકવાદીઓની કેદમાં રહ્યા બાદ બ્રોડુચ પરિવારનું ફરીથી મિલન થયું હતું. અવિચઈએ તેની વાઇફ હેગર અને તેમનાં બાળકોને ગળે લગાડ્યાં હતાં. તેમનાં બાળકોને બંધક બનાવાયાં હતાં

ઇઝરાયલની સરકારે ગઈ કાલે જણાવ્યું હતું કે ગાઝા પટ્ટીમાં હમાસ આતંકવાદી ગ્રુપે બંધક બનાવેલા વધુ લોકોને મુક્ત કરાવવા માટે એ યુદ્ધવિરામને લંબાવવા માટેનો વિચાર કરવા તૈયાર છે.

ઇઝરાયલની સરકારના પ્રવક્તા યીલોન લેવીએ રિપોર્ટર્સને જણાવ્યું હતું કે અમે બીજા ૫૦ બંધકોને પાછા મેળવવા માગીએ છીએ. દરમ્યાન યુદ્ધવિરામને બે દિવસ માટે લંબાવાયો છે. ઇઝરાયલ અને હમાસ વચ્ચેના યુદ્ધવિરામ માટેના કરાર અનુસાર હમાસ દ્વારા ૧૦ બંધકોને છોડવામાં આવે તો એના બદલામાં ઇઝરાયલ યુદ્ધવિરામનો એક એક્સ્ટ્રા દિવસ લંબાવશે.

હમાસે પણ યુદ્ધવિરામ લંબાવવા માટેની તૈયારી બતાવી હતી. આ ગ્રુપે મધ્યસ્થી કરનારાઓને જણાવ્યું હતું કે એ યુદ્ધવિરામને બેથી ચાર દિવસ વધુ લંબાવવા માટે તૈયાર છે.

સોર્સે જણાવ્યું કે જો યુદ્ધવિરામ લંબાવવામાં આવ્યા બાદ હમાસ ઇઝરાયલના બીજા ૨૦થી ૪૦ બંધકોને મુક્ત કરી શકે છે. યુદ્ધવિરામ લંબાવવા માટે કતાર અને ઇજિપ્ત મધ્યસ્થી કરી છે.