26 August, 2026 11:47 AM IST | Islamabad | Gujarati Mid-day Online Correspondent
પ્રતીકાત્મક ફાઇલ તસવીર
ઈસ્લામાબાદ (Islamabad) માં આવેલી પાકિસ્તાન ઈન્સ્ટિટ્યૂટ ઓફ મેડિકલ સાયન્સ (Pakistan Institute of Medical Sciences) હોસ્પિટલના ગાયનેકોલોજી વોર્ડમાં બુધવારે સવારે, ૨૬ ઓગસ્ટે ફાટી નીકળેલી ભિષણ આગમાં ઓછામાં ઓછા ૧૫ નવજાત શિશુઓના મોત નીપજ્યા છે. આ સરકારી હોસ્પિટલના નર્સરી વિભાગમાં આગ લાગતાં અંદર રહેલા અનેક નવજાત બાળકો ફસાયા હતા. આગ પર કાબૂ મેળવવા અને કૂલિંગ કામગીરી હાથ ધરવા માટે ઈમરજન્સી રેસ્ક્યૂ ટીમો તાત્કાલિક ઘટનાસ્થળે પહોંચી હતી, પરંતુ આ અગ્નિકાંડમાં બાળકોને ગંભીર નુકસાન પહોંચ્યું હતું.
રેસ્ક્યૂ અધિકારીઓ અને હોસ્પિટલના સ્ટાફના જણાવ્યા અનુસાર, આગ સવારે ૭:૦૦ વાગ્યાના સુમારે મેટરનલ એન્ડ ચાઈલ્ડ હેલ્થ (Maternal and Child Health) બિલ્ડિંગના ત્રીજા માળે લાગી હતી, જ્યાં ગાયનેકોલોજી વોર્ડ અને નવજાત શિશુઓની નર્સરી આવેલી છે. પ્રાથમિક તપાસમાં બહાર આવ્યું છે કે નર્સરી અંદર એર-કંડિશનરનું કોમ્પ્રેસર ફાટવાને કારણે આગ લાગી હતી, જેના લીધે શોર્ટ સર્કિટ થયું હતું અને બંધ રૂમમાં ગાઢ ધુમાડો ભરાઈ ગયો હતો.
ઘટના સમયે (Islamabad Hospital Fire) હોસ્પિટલની નર્સરીમાં ૧૬ નવજાત બાળકો દાખલ હતા. હોસ્પિટલના કર્મચારીઓ અને રેસ્ક્યૂ વર્કર્સ ધુમાડાથી ભરેલા વોર્ડમાંથી માત્ર એક જ બાળકને જીવંત બહાર કાઢી શક્યા હતા, જ્યારે બાકીના ૧૫ માસૂમ બાળકો ગંભીર રીતે દાઝી જવાથી અને ગૂંગળામણને કારણે મૃત્યુ પામ્યા હતા. જિલ્લા વહીવટીતંત્રના અધિકારીઓએ જણાવ્યું હતું કે આગની તીવ્રતા વધુ હોવાને કારણે મૃત્યુ પામેલા ૧૪ બાળકો ખૂબ ગંભીર રીતે દાઝી ગયા હતા.
આ કરુણ દુર્ઘટના પર પ્રતિક્રિયા આપતાં પાકિસ્તાનના પ્રધાનમંત્રી શહબાઝ શરીફ (Shehbaz Sharif)એ ઊંડા શોકની લાગણી વ્યક્ત કરી હતી અને પીડિત પરિવારો પ્રત્યે સંવેદના પ્રગટ કરતાં બાળકોના મોતને "અપુરી શકાય તેવી ખોટ" ગણાવી હતી. પ્રધાનમંત્રી શરીફે આ દુર્ઘટના અંગે તાત્કાલિક ઉચ્ચ સ્તરીય તપાસનો આદેશ આપ્યો છે અને વહીવટી કે સુરક્ષા ક્ષતિઓ માટે જવાબદાર સામે કડક કાર્યવાહી કરવાની સૂચના આપી છે.
ભવિષ્યમાં આવી ઘટનાઓ અટકાવવા માટે પ્રધાનમંત્રીએ તમામ સરકારી હોસ્પિટલોમાં ફાયર સેફ્ટી અને ઈલેક્ટ્રિકલ સેફ્ટીના ધોરણોની ચકાસણી કરવા માટે વ્યાપક સેફ્ટી ઓડિટ કરવાનો પણ નિર્દેશ આપ્યો છે.
કેન્દ્રીય નેતૃત્વની સૂચનાને પગલે, સ્થાનિક સત્તાવાળાઓએ આગની ઘટનાના મૂળ કારણની તપાસ કરવા માટે એડિશનલ ડેપ્યુટી કમિશનર જનરલના નેતૃત્વ હેઠળ એક તપાસ સમિતિની રચના કરી છે. આ સમિતિને હોસ્પિટલની ઈલેક્ટ્રિકલ સિસ્ટમની સ્થિતિ, ઈમરજન્સી પ્રતિભાવ અને સુરક્ષા ખામીઓ માટેની જવાબદારી નક્કી કરવાની જવાબદારી સોંપવામાં આવી છે.
બીજી તરફ, ફોરેન્સિક ટીમો નર્સરી વોર્ડમાંથી પુરાવા એકત્ર કરી રહી છે ત્યારે પીઆઈએમએસ હોસ્પિટલના અધિકારીઓ અને સ્થાનિક પોલીસ હોસ્પિટલ બહાર એકઠા થયેલા પીડિત પરિવારજનોને મદદ પૂરી પાડી રહ્યા છે.
