અમેરિકાના ટેક્સસમાં હનુમાનજીની ૯૦ ફુટ ઊંચી મૂર્તિ સામે વાંધો પડ્યો ખ્રિસ્તીઓને

સ્થાનિક લોકોએ હિન્દુ મૂર્તિને બનાવટી ભગવાન ગણાવીને વિરોધ નોંધાવ્યા બાદ સ્થિતિ વણસી

હનુમાનજીની ૯૦ ફુટ ઊંચી અને ૯૦ ટન વજનની ભવ્ય મૂર્તિ

અમેરિકાના ટેક્સસ રાજ્યમાં હ્યુસ્ટન નજીક આવેલા શ્રી અષ્ટલક્ષ્મી મંદિરમાં હનુમાનજીની ૯૦ ફુટ ઊંચી અને ૯૦ ટન વજનની ભવ્ય મૂર્તિ સ્થાપવામાં આવી છે. સ્ટૅચ્યુ ઑફ યુનિયન તરીકે ઓળખાતી આ મૂર્તિ અમેરિકાની ચોથા નંબરની સૌથી ઊંચી મૂર્તિ છે. જોકે આ ઑગસ્ટ મહિનામાં એનું અનાવરણ થતાં જ કેટલાંક સ્થાનિક ખ્રિસ્તી જૂથો અને રાજકારણીઓએ એનો ભારે વિરોધ શરૂ કર્યો છે.

સ્થાનિક ખ્રિસ્તી સમુદાયના લોકોએ આ મૂર્તિને બનાવટી ભગવાન ગણાવીને એવો દાવો કર્યો છે કે ખ્રિસ્તી રાષ્ટ્રમાં આવી મૂર્તિનું કોઈ સ્થાન નથી. કેટલાક રૂઢિચુસ્ત નેતાઓએ તો એવો પણ ડર બતાવ્યો કે થર્ડ વર્લ્ડના એલિયન્સ ટેક્સસ પર કબજો જમાવી રહ્યા છે.

બીજી તરફ ભારતીય-અમેરિકન સમુદાયના લોકોએ સ્પષ્ટ કર્યું છે કે આ મૂર્તિ પૂરેપૂરી કાયદેસર છે અને એ હિન્દુ અમેરિકનોની આસ્થાનું પ્રતીક છે. બૅન્ગલોર અને અન્ય સ્થળોએથી ભારતીય શિલ્પકારો દ્વારા બનાવવામાં આવેલી આ મૂર્તિનો કુલ ખર્ચ ૭૬ કરોડ રૂપિયા (૮૦ લાખ ડૉલર) જેટલો થયો છે.