સોનાના ભાવમાં બેફામ વધારો થવાથી ઑગસ્ટ મહિનામાં જૂનું સોનું વેચવાનું પ્રમાણ વધ્યું

ઑગસ્ટમાં અત્યાર સુધીમાં જૂના સોના માટે રોકડ વ્યવહારોનો હિસ્સો કુલ વ્યવહારોના લગભગ ૨૦ ટકા સુધી વધી ગયો છે

પ્રતીકાત્મક તસવીર

સોનાના ભાવ આસમાને પહોંચવાની સાથે લોકો તેમનાં લૉકરોમાં રહેલા જૂના દાગીના કાઢીને વેચી રહ્યા છે અને ઘરોમાં રોકડ રકમ જમા કરી રહ્યા છે. આ મહિને સોનાના ભાવ રેકૉર્ડ ઊંચાઈએ પહોંચ્યા હોવાથી ઝવેરી બજારમાં જૂનું સોનું વેચવા આવતા લોકોની સંખ્યામાં વધારો થયો છે. લોકો વધતા જતા ફુગાવાનો સામનો કરવા અને નફો કમાવા માટે પોતાનું સોનું વેચી રહ્યા છે.
જ્વેલર્સ અને ગોલ્ડ રિફાઇનરોએ જૂના સોનાના પ્રવાહમાં અચાનક ઉછાળો જોયો છે. ગ્રાહકો રોકડ એકઠી કરવા માટે ઊંચા ભાવનો લાભ લઈ રહ્યા છે. બીજી તરફ જ્વેલર્સ કહે છે કે રીસાઇકલ કરેલા સોનાનો વધતો પુરવઠો મોંઘા આયાતી સોના પર તેમની નિર્ભરતા ઘટાડવામાં મદદ કરી રહ્યો છે.

ઑગસ્ટમાં અત્યાર સુધીમાં જૂના સોના માટે રોકડ વ્યવહારોનો હિસ્સો કુલ વ્યવહારોના લગભગ ૨૦ ટકા સુધી વધી ગયો છે, જે એક વર્ષ પહેલાં માત્ર પાંચ ટકા હતો. ભારતીયો રોકડ એકઠી કરવા માટે પોતાનું ઘરેલુ સોનું વેચી રહ્યા છે. સોનાના ભાવ પ્રતિ ૧૦ ગ્રામ ૧.૬૦ લાખને વટાવી ગયા છે અને આ મહિનામાં અત્યાર સુધીમાં ૧૪ ટકા વધ્યા છે. આ તેજી કેટલો સમય ચાલશે એની અનિશ્ચિતતા વચ્ચે ગ્રાહકો ખર્ચાઓને પહોંચી વળવા અને નફો મેળવવા માટે પોતાનું ઘરેલુ સોનું વેચી રહ્યા છે.