03 October, 2026 09:25 PM IST | Mumbai | Gujarati Mid-day Online Correspondent
પ્રતીકાત્મક ફાઇલ તસવીર
વૈશ્વિક તણાવ વચ્ચે ક્રૂડ ઓઈલના ભાવમાં સતત વધારો જોવા મળી રહી છે. આ દરમિયાન, ભારતની અગ્રણી ખાનગી ઈંધણ કંપનીઓમાંની એક, `નાયરા એનર્જી` (Nayara Energy) એ પેટ્રોલ અને ડીઝલના ભાવમાં વધારો કર્યો છે. કંપનીએ પેટ્રોલના ભાવમાં પ્રતિ લિટર રૂ. 5 અને ડીઝલના ભાવમાં પ્રતિ લિટર રૂ. 3નો વધારો કર્યો છે. આ નિર્ણય એવા સમયે લેવામાં આવ્યો છે જ્યારે આંતરરાષ્ટ્રીય બજારમાં ક્રૂડ ઓઈલ અને રિફાઈન્ડ પેટ્રોલિયમ ઉત્પાદનોના ભાવમાં સતત વધઘટ થઈ રહી છે. કંપનીના જણાવ્યા અનુસાર, આંતરરાષ્ટ્રીય ખર્ચ અને સ્થાનિક છૂટક ભાવ વચ્ચેના તફાવતને ઘટાડવા માટે આ પગલું લેવામાં આવ્યું છે.
ઈરાન અને અમેરિકા વચ્ચેના પ્રારંભિક સંઘર્ષ દરમિયાન ઊર્જા પુરવઠા પર અસર પડી હતી. તે સમયે વૈશ્વિક બજારમાં ક્રૂડ ઓઈલના ભાવમાં વધારો થયો હતો. તેમ છતાં, ભારતીય ઓઈલ કંપનીઓએ સ્થાનિક ઈંધણના ભાવ સ્થિર રાખવાનો પ્રયાસ કર્યો હતો. 26 માર્ચે પેટ્રોલના ભાવમાં પ્રતિ લિટર રૂ. 5 અને ડીઝલના ભાવમાં પ્રતિ લિટર રૂ. 3નો વધારો કરવામાં આવ્યો હતો. જોકે, બાદમાં આંતરરાષ્ટ્રીય બજારમાં ક્રૂડ ઓઈલના ભાવ ઘટતાં કંપનીએ આ વધારો પાછો ખેંચી લીધો હતો. હવે ફરી એકવાર, આંતરરાષ્ટ્રીય બજારમાં વધતા ખર્ચને ધ્યાનમાં રાખીને નાયરા એનર્જીએ પેટ્રોલ અને ડીઝલના ભાવ વધારવાનો નિર્ણય લીધો છે.
આંતરરાષ્ટ્રીય બજારમાં ક્રૂડ ઓઈલ અને રિફાઈન્ડ પેટ્રોલિયમ ઉત્પાદનોના ભાવ સ્થાનિક ઈંધણના ભાવને અસર કરતા મુખ્ય પરિબળો માનવામાં આવે છે. વૈશ્વિક ઊર્જા બજારમાં અસ્થિરતાને કારણે ઈંધણના છૂટક વિક્રેતાઓ માટે ખર્ચ વધી રહ્યો છે. નાયરા એનર્જીનું કહેવું છે કે ભાવ વધારાનો ઉદ્દેશ્ય વધતા આંતરરાષ્ટ્રીય ખર્ચ અને સ્થાનિક વેચાણ દરો વચ્ચેના અંતરને ઘટાડવાનો છે.
વૈશ્વિક ઊર્જા બજારમાં તણાવ વચ્ચે, હોરમઝની સામુદ્રધુનીની સ્થિતિ ચિંતાનો વિષય બની રહી છે. વધતા તણાવ અને આ વિસ્તારમાં ઓઈલ ટૅન્કરો પર હુમલાના અહેવાલોને કારણે ક્રૂડ ઓઈલના પુરવઠા અંગે અનિશ્ચિતતા યથાવત છે. પરિણામે, આંતરરાષ્ટ્રીય ઓઈલ બજારમાં ભાવમાં સતત વધઘટ જોવા મળી રહી છે. તેની અસર ભારતમાં ઈંધણના ભાવ પર પણ પડી રહી છે.
