આઇસી૧૫ ઇન્ડેક્સ ૨૩૨ પૉઇન્ટ વધ્યો

ઇન્ડેક્સ ૩૩,૭૦૬ ખૂલીને ૩૪,૧૪૦ની ઉપલી અને ૩૩,૫૫૯ની નીચલી સપાટીએ પહોંચ્યો હતો

પ્રતીકાત્મક તસવીર

મેક્રો-ઇકૉનૉમિક અંદાજમાં સુધારો થવાને પગલે વૈશ્વિક ક્રિપ્ટોકરન્સી માર્કેટમાં થોડો સુધારો જોવા મળ્યો છે. ૩.૦ વર્સે લૉન્ચ કરેલો વિશ્વનો સર્વપ્રથમ ક્રિપ્ટો ઇન્ડેક્સ – આઇસી૧૫ મંગળવારે બપોરે ૪ વાગ્યે પૂરા થયેલા ૨૪ કલાકમાં ૦.૬૯ ટકા (૨૩૨ પૉઇન્ટ) વધીને ૩૩,૯૩૮ પૉઇન્ટ બંધ રહ્યો હતો. ઇન્ડેક્સ ૩૩,૭૦૬ ખૂલીને ૩૪,૧૪૦ની ઉપલી અને ૩૩,૫૫૯ની નીચલી સપાટીએ પહોંચ્યો હતો. ઇન્ડેક્સના ઘટકોમાંથી ચેઇનલિન્ક, બીએનબી, અવાલાંશ અને પોલીગોનમાં વૃદ્ધિ થઈ હતી, જ્યારે સોલાના, શિબા ઇનુ, લાઇટકૉઇન અને ડોઝકૉઇનમાં ઘટાડો નોંધાયો હતો.  દરમ્યાન, તાઇવાનમાં નાણાકીય ક્ષેત્રના નિયમનકાર આ સપ્તાહના પાછલા ભાગમાં ક્રિપ્ટો સંબંધિત માર્ગદર્શિકા જાહેર કરવાના છે એની પહેલાં નવ ક્રિપ્ટો એક્સચેન્જોએ સંગઠન રચી લીધું છે. એનો ઉદ્દેશ માર્ગદર્શિકાના આધારે સમગ્ર ઉદ્યોગ માટે સ્વયંશિસ્ત માટેના નિયમો ઘડવાનો છે. અન્ય એક ઘટનામાં ફાઇનૅન્સ જપાન અને મિત્શુબિશી યુએફજે ટ્રસ્ટ બૅન્કે પ્રોગમેટ કૉઇન પ્લૅટફૉર્મ પર ફિયાટ કરન્સી આધારિત સ્ટેબલકૉઇન વિકસાવવા માટે સહયોગ સાધ્યો છે. બીજી બાજુ, ભારતની ક્રિપ્ટોકરન્સી ઇન્વેસ્ટમેન્ટ કંપની મુદ્રેક્સે ઇટલીમાં રજિસ્ટ્રેશન કરાવ્યા બાદ હવે યુનાઇટેડ કિંગડમમાં વિસ્તાર કરવાનું આયોજન કર્યું છે.