ડોનલ્ડ ટ્રમ્પ હવે ઈરાનના યુદ્ધથી કંટાળી ગયા છે

યુદ્ધ જિતાઈ ગયું છે એવા પ્રેસિડન્ટના દાવા સાથે વાઇટ હાઉસના અધિકારીઓમાં પણ મતમતાંતર છે. અધિકારીના દાવા મુજબ હવે ટ્રમ્પ બેઠક દરમ્યાન યુદ્ધને બદલે ઇકૉનૉમી, ઘરેલુ મુદ્દાઓ અને આવનારી ચૂંટણીઓની વાતો કરે છે

પ્રેસિડન્ટ ડોનલ્ડ ટ્રમ્પ અને તેમના પ્રશાસનની નીતિઓ વિરુદ્ધ અમેરિકામાં ગઈ કાલે ‘નો કિંગ્સ’ વિરોધ-પ્રદર્શનો યોજાયાં હતાં

અમેરિકાના પ્રેસિડન્ટ ડોનલ્ડ ટ્રમ્પ છેલ્લા ૧૦ દિવસમાં અનેક વાર કહી ચૂક્યા છે કે તેઓ ઈરાનનું યુદ્ધ ઑલરેડી જીતી ચૂક્યા છે. જોકે વાઇટ હાઉસના કેટલાક અધિકારીઓએ મીડિયાને કહ્યું હતું કે ઈરાનની લડાઈ વિશેનાં ટ્રમ્પનાં નિવેદનો આડાંઅવળાં, કન્ફ્યુઝન ઊભું કરતાં, મેદાન પર લડાતી લડાઈની અસલિયતથી અલગ છે. ઈરાન પર જીત મેળવી લીધાના દાવાઓ વિશે વાઇટ હાઉસના અધિકારીઓમાં પણ મતભેદ પડી ગયા છે. વાઇટ હાઉસના કેટલાક સિનિયર અધિકારીઓ પણ હવે નિરાશ અને કન્ફ્યુઝ થઈ ચૂક્યા છે, કેમ કે ઍડ્મિનિસ્ટ્રેશનની સીઝફાયરની ઇનડાયરેક્ટ વાતચીતોના સમાચાર વચ્ચે મિડલ ઈસ્ટમાં હજારો સૈનિકો પણ મોકલવામાં આવી રહ્યા છે. ટ્રમ્પ બહુ બઢાવી-ચડાવીને દાવો કરી રહ્યા છે એવું માનતા એક અધિકારીએ કહ્યું હતું કે ‘ઈરાનથી હવે ટ્રમ્પ બોર થઈ ગયા હોય એવું લાગે છે. એવું નથી કે તેમને આનો કોઈ પસ્તાવો છે કે બીજું કંઈ ગંભીર છે. તેઓ માત્ર બોર થઈ રહ્યા છે અને હવે આગળ વધવા માગે છે. ટ્રમ્પે લડાઈથી આગળ વધવાનું શરૂ કરી દીધું છે અને તેમણે હવે ઇકૉનૉમી, ઘરેલુ મુદ્દાઓ અને આવનારી મિડ-ટર્મ ચૂંટણીઓ વિશે વાત કરવાનું શરૂ કરી દીધું છે.’

ડોનલ્ડ ટ્રમ્પની નીતિઓના વિરોધમાં હજારો રૅલી, નો કિંગ્સનાં પ્લૅકાર્ડ્‍સ લઈને અમેરિકનો પહોંચ્યા

પ્રેસિડન્ટ ડોનલ્ડ ટ્રમ્પ અને તેમના પ્રશાસનની નીતિઓ વિરુદ્ધ અમેરિકામાં ગઈ કાલે ‘નો કિંગ્સ’ વિરોધ-પ્રદર્શનો યોજાયાં હતાં. ૫૦ રાજ્યોમાં ૩૨૦૦થી વધુ વિરોધ-પ્રદર્શન કાર્યક્રમોનું આયોજન કરવામાં આવ્યું હતું. એવું માનવામાં આવે છે કે અમેરિકાના ઇતિહાસમાં આ સૌથી મોટું એક દિવસનું અહિંસક વિરોધ-પ્રદર્શન હોઈ શકે છે. અગાઉના બે ‘નો કિંગ્સ’ કાર્યક્રમોમાં લાખો સહભાગીઓએ ભાગ લીધો હતો. ફ્લૅગશિપ રૅલીઓ ન્યુ યૉર્ક, લૉસ ઍન્જલસ, વૉશિંગ્ટન અને મિનેસોટાના ટ્‍વિન સિટીઝમાં યોજાઈ હતી. જોકે બે-તૃતીયાંશ ભાગ લેનારાઓ મુખ્ય શહેર કેન્દ્રોની બહારથી આવવાની અપેક્ષા રાખે છે, જે ગયા જૂનમાં ચળવળના પ્રથમ એકત્રીકરણથી નાના સમુદાયો માટે લગભગ ૪૦ ટકા વધારો છે.

ડોનલ્ડ ટ્રમ્પે કહ્યું કે હવે ક્યુબાનો વારો

ઈરાન અને વેનેઝુએલામાં અમેરિકન સૈન્યની સફળતાનો દાવો

અમેરિકાના પ્રેસિડન્ટ ડોનલ્ડ ટ્રમ્પે ઈરાન અને વેનેઝુએલામાં અમેરિકન સૈન્યની સફળતાનો દાવો કરીને કહ્યું હતું કે હવે ક્યુબાનો વારો છે. ડોનલ્ડ ટ્રમ્પે ફ્લૉરિડામાં એક બિઝનેસ સમિટના ભાષણમાં કહ્યું હતું કે ‘મેં અમેરિકન લશ્કરને ખૂબ જ મજબૂત બનાવ્યું છે. મેં ક્યારેય વિચાર્યું નહોતું કે મારે એનો ઉપયોગ કરવો પડશે, પરંતુ ક્યારેક અમારે કરવું પડે છે. હવે ક્યુબાનો નંબર છે.’
જોકે ક્યુબા સાથે શું કરવાની યોજના બનાવી રહ્યા છે એ ટ્રમ્પે સ્પષ્ટ કર્યું નથી. માયામીમાં સાઉદી અરેબિયા સમર્થિત ફ્યુચર ઇન્વેસ્ટમેન્ટ ઇનિશિયેટિવ ઇન્સ્ટિટ્યૂટ કાર્યક્રમમાં ક્યુબા વિશે કરેલી ટિપ્પણી કૅરિબિયન ટાપુ રાષ્ટ્ર સામેની તેમની નવીનતમ ધમકી હતી, જેની સામ્યવાદી સરકાર વૉશિંગ્ટન તરફથી વધતા દબાણનો સામનો કરી રહી છે. ટ્રમ્પ પ્રશાસને જાન્યુઆરીથી ક્યુબા પર તેલ નાકાબંધી લાદી છે. વેનેઝુએલાથી તેલપુરવઠો સ્થગિત કર્યા પછી ઈંધણની તીવ્ર અછતને કારણે ક્યુબા ઊંડા આર્થિક સંકટનો સામનો કરી રહ્યું છે. ઈંધણની અછતને કારણે દેશવ્યાપી બ્લૅકઆઉટ થયું છે.