ભારત અને અન્ય ૧૯ દેશોની કેટલીક સ્પેશ્યલિટી દવાઓ પર અમેરિકા ટૅરિફ નહીં લગાવે

૨૯ સપ્ટેમ્બરથી પેટન્ટ ધરાવતી દવાઓ પર ૧૦૦ ટકા ટૅરિફ લાગુ થવાની તૈયારી વચ્ચે મોટી રાહત

પ્રતીકાત્મક તસવીર

અમેરિકાના વાણિજ્ય વિભાગે એક નોટિસ જાહેર કરીને મોટી જાહેરાત કરી છે કે ભારત સહિત ૨૦ દેશોમાંથી આયાત થતી કેટલીક સ્પેશ્યલિટી દવાઓ અને એના સંબંધિત ઘટકો પર કોઈ ઍડ વેલોરમ ટૅરિફ (મૂલ્યઆધારિત કર) લગાવવામાં નહીં આવે. અમેરિકા કેટલીક પેટન્ટ ધરાવતી ફાર્માસ્યુટિકલ પ્રોડક્ટ્સ અને એની સામગ્રીની આયાત પર ૧૦૦ ટકા ટૅરિફ લાદવાની તૈયારી કરી રહ્યું છે એવા સમયે આ જાહેરાતથી મોટી રાહત મળી છે.

આ શૂન્ય ટૅરિફનો લાભ દુર્લભ મેડિકલ સ્થિતિની સારવારમાં વપરાતાં ઉત્પાદનો, વંધ્યત્વની સારવાર, સેલ થેરપી, જીન થેરપી અને ઍનિમલ ફાર્માસ્યુટિકલ્સ માટે લાગુ થશે. આ દવાઓમાં વપરાતા ઘટકોને પણ છૂટ મળશે. ભારત ઉપરાંત આર્જેન્ટિના, બંગલાદેશ, કમ્બોડિયા, યુરોપિયન યુનિયન, જપાન, સાઉથ કોરિયા, વિયેટનામ સહિતના દેશોને પણ શૂન્ય ટૅરિફ કૅટેગરીમાં મૂકવામાં આવ્યાં છે.
નોંધનીય છે કે રાષ્ટ્રપતિ ડોનલ્ડ ટ્રમ્પે ઘરેલુ ઉત્પાદનને પ્રોત્સાહન આપવાના પ્રયાસરૂપે બીજી એપ્રિલે અમેરિકામાં પેટન્ટ દવાઓ અને સંબંધિત ઘટકોની આયાત પર ૧૦૦ ટકા ટૅરિફ લાદવાની જાહેરાત કરી હતી. જોકે હવે વાણિજ્ય વિભાગે સ્પષ્ટતા કરી છે કે કેટલીક જેનરિક પ્રોડક્ટ્સ આ ટૅરિફના દાયરામાં નહીં આવે.