22 December, 2025 09:05 AM IST | Johannesburg | Gujarati Mid-day Correspondent
પ્રતીકાત્મક તસવીર
સાઉથ આફ્રિકાના જોહનિસબર્ગ શહેરથી ૪૦ કિલોમીટર દૂર આવેલા સોનાની ખાણના વિસ્તારમાં બેકર્સડેલ ટાઉનશિપમાં એક બારમાં અજાણ્યા બંદૂકધારીઓએ શનિવારે રાત્રે ૧ વાગ્યે કરેલા અંધાધૂંધ ગોળીબારમાં ઓછામાં ઓછા ૯ જણે જીવ ગુમાવ્યા હતા અને ૧૦ અન્ય ઘાયલ થયા હતા. સાઉથ આફ્રિકામાં આ મહિને ગોળીબારની આ બીજી મોટી ઘટના છે.
આ ઘટના વિશે પોલીસે જણાવ્યું હતું કે બંદૂકધારીઓ બે વાહનોમાં આવ્યા હતા અને બારની અંદર બેઠેલા લોકો પર ગોળીબાર કર્યો હતો. ઘટનાસ્થળેથી ભાગી રહેલા લોકો પર પણ ફાયરિંગ કરવામાં આવ્યું હતું. આ હુમલા પાછળનો હેતુ જાણી શકાયો નથી. હુમલાખોરોને પકડવા માટે સર્ચ ઑપરેશન શરૂ કરવામાં આવ્યું છે.
બેકર્સડેલ સાઉથ આફ્રિકાની કેટલીક સૌથી મોટી સોનાની ખાણોની નજીક આવેલો એક ગરીબ વિસ્તાર છે. આ પહેલાં ૬ ડિસેમ્બરે બંદૂકધારીઓએ રાજધાની પ્રિટોરિયા નજીક એક હૉસ્ટેલ પર હુમલો કર્યો હતો જેમાં ત્રણ વર્ષના બાળક સહિત ૧૨ જણે જીવ ગુમાવ્યા હતા.