04 March, 2026 08:34 AM IST | Dubai | Gujarati Mid-day Correspondent
પ્રતીકાત્મક તસવીર
દુબઈ અને અબુ ધાબી પર ઈરાની મિસાઈલ અને ડ્રોન હુમલા બાદ આ શહેરોમાં રહેતા અતિ શ્રીમંત રહેવાસીઓ અને અધિકારીઓએ આ શહેરોમાંથી બહાર નીકળી જવા માટે દોડાદોડી કરી છે. એના કારણે ગલ્ફ ક્ષેત્રમાં પ્રાઇવેટ જેટના ભાવ રેકૉર્ડ સ્તરે પહોંચી ગયા છે. અતિ શ્રીમંત લોકો મિડલ-ઈસ્ટમાંથી બહાર નીકળવા માટે પ્રાઇવેટ જેટ ભાડે લેવા માટે ૩,૫૦,૦૦૦ ડૉલર (આશરે ૩.૨૨ કરોડ રૂપિયા) ખર્ચ કરી રહ્યા છે. સાઉદી અરેબિયા જવા માટે ૧૦-૧૦ કલાકની લાંબી ડ્રાઇવ કરવા માટે પણ તેઓ તૈયાર છે જેથી તેઓ ત્યાંથી પ્રાઇવેટ જેટમાં યુરોપ જઈ શકે.
દુબઈ ઇન્ટરનૅશનલ ઍરપોર્ટ જેવા મુખ્ય ઍરપોર્ટને હુમલાથી થયેલા નુકસાનને કારણે બંધ કરવામાં આવ્યાં છે. આના કારણે પ્રાઇવેટ જેટની માગણી વધી છે. દુબઈ અને અબુ ધાબીમાં રહેતા શ્રીમંતો ત્યાંથી નીકળવા માટે કોઈ પણ રકમ ખર્ચ કરવા તૈયાર છે. ત્યાંથી નીકળીને તેઓ સાઉદી અરેબિયા જઈને ત્યાંથી તેઓ યુરોપ જવા માગે છે.
એક પ્રાઇવેટ બ્રોકરેજ કંપનીએ જણાવ્યું હતું કે શ્રીમંતો તેમની મોંઘી ગાડીઓ અને વૈભવશાળી બંગલાઓ છોડીને ભાગવા તૈયાર છે અને એના સિવાય બીજો વિકલ્પ તેમના માટે બચ્યો નથી. આથી દર કલાકે પ્રાઇવેટ જેટનું ભાડું વધી રહ્યું છે. અમારો સંપર્ક શ્રીમંત પરિવારો અને કૉર્પોરેટ હાઉસો દ્વારા કરવામાં આવ્યો છે. તેઓ આ પ્રદેશમાંથી બહાર નીકળવા માગે છે.
