પાકિસ્તાનમાં હૉસ્પિટલની બેદરકારીથી ૩૩૧ બાળકો HIV પૉઝિટિવ

એક બાળકના મૃત્યુ બાદ થયો ખુલાસો, ચેપનું કારણ હતું સિરિન્જનો વારંવારનો ઉપયોગ

પ્રતીકાત્મક તસવીર (તસવીર સૌજન્યઃ એઆઇ)

પાકિસ્તાનના પંજાબ પ્રાંતના તૌંસા શહેરમાં ૩૩૧ બાળકો HIV (હ્યુમન ઇમ્યુનોડેફિશ્યન્સી વાઇરસ) પૉઝિટિવ મળી આવ્યાં હતાં. આ કેસ નવેમ્બર ૨૦૨૪થી ઑક્ટોબર ૨૦૨૫ દરમ્યાન નોંધાયા હતા. આ કેસમાં સરકારી હૉસ્પિટલ સામે ગંભીર બેદરકારીના આરોપો લગાવવામાં આવ્યા છે. જાણવા મળે છે કે તૌંસા હૉસ્પિટલમાં સિરિન્જનો વારંવાર ઉપયોગ થઈ રહ્યો હતો. ઘણા કિસ્સાઓમાં એક જ દવાની શીશીથી અલગ-અલગ બાળકોને ઇન્જેક્ટ કરવામાં આવ્યાં હતાં, જેનાથી ચેપનું જોખમ વધી ગયું હતું.

૮ વર્ષના મોહમ્મદ અમીનના મૃત્યુ પછી આ કેસ પ્રકાશમાં આવ્યો હતો. તેની બહેન પણ HIV પૉઝિટિવ છે. માતાનો દાવો છે કે હૉસ્પિટલમાં સારવાર દરમ્યાન બાળકોને દૂષિત સોયથી HIV થયો હતો.

હૉસ્પિટલના ગુપ્ત રેકૉર્ડિંગમાં એવું જોવા મળ્યું હતું કે મલ્ટિ-ડોઝ શીશી માટે ૧૦ વખત સિરિન્જનો ફરીથી ઉપયોગ કરવામાં આવ્યો હતો. ચેપી રોગના નિષ્ણાતોના કહેવા મુજબ સિરિન્જનો પાછળનો ભાગ વાઇરસનો ચેપ ફેલાવી શકે છે.