વેનેઝુએલામાં કુદરતની કમાલ : કાટમાળમાં દટાયેલી મહિલાએ બાળકને આપ્યો જન્મ

લ ગ્લાઇરામાં કાટમાળના ઢગલા વચ્ચે મહિલા હોવાના સગડ મળ્યા બાદ રેસ્ક્યુ ટીમે ત્યાં પહોંચીને ભગીરથ કામ પૂરું પાડ્યું

વેનેઝુએલાના શહેર લ ગ્લાઇરામાં કાટમાળમાંથી નવજાત બાળકને જીવતું બહાર કાઢવામાં આવ્યું હતું. નવજાત બાળક સાથે મહિલાને જીવતી બહાર કાઢવામાં આવી એ પછી તેને એક ટ્રકમાં હૉસ્પિટલ લઈ જવાઈ હતી.

વેનેઝુએલામાં આવેલા વિનાશક ભૂકંપની ભારે તબાહી વચ્ચે લ ગ્લાઇરા શહેરમાંથી એક આશ્ચર્યજનક અને હૃદયસ્પર્શી ઘટના સામે આવી છે. અહીં કાટમાળ નીચે દબાયેલી એક ગર્ભવતી મહિલાએ હૉસ્પિટલ પહોંચતાં પહેલાં કૉન્ક્રીટ અને પથ્થરોના ઢગલા વચ્ચે જ એક સ્વસ્થ બાળકને જન્મ આપ્યો છે. આપત્તિની આ કટોકટી વચ્ચે અદ્ભુત રીતે માતા અને નવજાત શિશુ બન્નેનો આબાદ બચાવ થયો છે.

કાટમાળમાં મહિલા હોવાની ભાળ મળી: બચાવ-કામગીરી દરમ્યાન જ્યારે રેસ્ક્યુ ટીમ અને સ્થાનિક સ્વયંસેવકો ધ્વસ્ત થયેલી ઇમારતોમાં જીવિત લોકોને શોધી રહ્યા હતા ત્યારે તેમને એક ધરાશાયી બિલ્ડિંગના કાટમાળ નીચે આ મહિલા ફસાયેલી હોવાના સંકેત મળ્યાં હતાં. ટીમના સભ્યો જ્યારે ભારે જહેમત બાદ મહિલા સુધી પહોંચ્યા ત્યારે તે પ્રસૂતિની પીડાથી કણસી રહી હતી. સ્થિતિ અત્યંત નાજુક હોવાથી તેને બહાર કાઢતાં પહેલાં જ તબીબી ટીમે કાટમાળની અંદર, પથ્થરોની વચ્ચે જ તેની ડિલિવરી કરાવવાનો મોટો નિર્ણય લીધો હતો.

ડૉક્ટર્સે કાટમાળમાં પ્રસૂતિ કરાવી : ભારે જોખમ અને મર્યાદિત સાધનો વચ્ચે તબીબી સ્ટાફે સફળતાપૂર્વક પ્રસૂતિ કરાવી હતી. ત્યાર બાદ બચાવકર્મીઓએ ખૂબ જ સાવધાનીપૂર્વક માતા અને નવજાત બાળકને સુરક્ષિત રીતે બહાર કાઢી તાત્કાલિક નજીકની હૉસ્પિટલ ખસેડ્યા હતા, જ્યાં હાલ બન્ને સારવાર હેઠળ છે અને સુરક્ષિત છે. સોશ્યલ મીડિયા પર આ અદ્ભુત રેસ્ક્યુના ફોટો અને વિડિયો વાઇરલ થતાં લોકો મહિલાની અસાધારણ હિંમત અને રેસ્ક્યુ ટીમના સમર્પણને સલામ કરી રહ્યા છે.