બૅટ્સમૅન માટે હેલ્મેટ ફરજિયાત કરો : તેન્ડુલકર
સચિન તેન્ડુલકર
બૅટ્સમૅનની સુરક્ષાને ધ્યાનમાં રાખીને ક્રિકેટજગતના ભગવાન ગણાતા સચિન તેન્ડુલકરે ઇન્ટરનૅશનલ ક્રિકેટ કાઉન્સિલને લેવલ પર રમતા બૅટ્સમૅન માટે હેલ્મેટ ફરજિયાત કરવાની માગણી કરી છે. વાસ્તવમાં સચિન તેન્ડુલકરે એક વિડિયો શૅર કર્યો હતો જેમાં પંજાબના ફીલ્ડર નિકોલસ પૂરનને બૉલ ફેંકવામાં આવે છે અને એ હૈદરાબાદના ઑલરાઉન્ડર વિજયશંકરને માથામાં વાગે છે. આ વિડિયો વાસ્તવમાં આઇપીએલની વેબસાઇટ પર અપલોડ કરવામાં આવ્યો હતો. માથામાં બૉલ વાગતાં શંકર ગ્રાઉન્ડમાં પડી ગયો હતો અને ફિઝિયોથેરપિસ્ટ દોડતા મેદાનમાં પહોંચી ગયા હતા. નસીબજોગ વિજયશંકરે હેલ્મેટ પહેરી હતી.
સચિને ટ્વિટ કરતાં જણાવ્યું કે ‘રમત ઝડપી છે, પણ શું એ સુરક્ષિત છે? તાજેતરમાં આપણે એક એવી ઘટના જોઈ હતી. સ્પિનર હોય કે પેસર, પ્રોફેશનલ લેવલ પર રમતા બૅટ્સમૅન માટે હેલ્મેટ પહેરવી જરૂરી છે. હું આઇસીસીને વિનંતી કરું છું કે તેઓ આ મુદ્દાને પ્રાથમિકતા આપે.’