સચિનને ૧૦૦મી ઐતિહાસિક સેન્ચુરી માટે હવે બેસ્ટ ચાન્સ

(અનંત ગવંડળકર)

મુંબઈ, તા. ૨૧

ઑસ્ટ્રેલિયાના પ્રવાસે ગયેલી ભારતીય ટીમના ૧૭માંથી ૭ પ્લેયરો એ દેશમાં અગાઉ ટેસ્ટક્રિકેટ રમી ચૂક્યા છે અને એ સાત ખેલાડીઓમાંથી મુખ્ય ચાર બૅટ્સમેનોમાં સચિન તેન્ડુલકરે કાંગારૂઓની ધરતી પર સૌથી સારી સફળતા મેળવી છે.

કૅપ્ટન મહેન્દ્ર સિંહ ધોની, વાઇસ કૅપ્ટન વીરેન્દર સેહવાગ, સચિન તેન્ડુલકર, રાહુલ દ્રવિડ, વીવીએસ લક્ષ્મણ તેમ જ પેસબોલરો ઝહીર ખાન અને ઇશાન્ત શર્મા અગાઉ ઑસ્ટ્રેલિયામાં ટેસ્ટસિરીઝ રમ્યા છે અને એમાંથી સેહવાગ, સચિન, દ્રવિડ અને લક્ષ્મણે સેન્ચુરીનો સ્વાદ માણ્યો છે. ભારત-ઑસ્ટ્રેલિયા પ્રથમ ટેસ્ટમૅચ (સ્ટાર ક્રિકેટ પર સવારે ૫.૦૦) સોમવારથી મેલબૉર્નમાં રમાશે.

સચિન તેન્ડુલકરના ૧૫૨૨ રન

ઑસ્ટ્રેલિયા ગયેલા બધા ભારતીય પ્લેયરોમાં સચિન સૌથી વધુ ૧૬ ટેસ્ટ રમ્યો છે અને સૌથી વધુ ૬ ટેસ્ટસદી ફટકારી છે એ જોતાં તેને આ સિરીઝમાં ૧૦૦મી આંતરરાષ્ટ્રીય સદી ફટકારવાનો સારો મોકો છે. તેણે ઑસ્ટ્રેલિયામાં ૫૮.૫૩ની બૅટિંગ-ઍવરેજે ૧૫૨૨ રન બનાવ્યા છે જેમાં ૨૪૧ નૉટઆઉટ તેનો હાઇએસ્ટ સ્કોર છે.

મહેન્દ્ર સિંહ ધોની સૌથી ખરાબ રમ્યો છે

ઑસ્ટ્રેલિયા ગયેલી ભારતીય ટીમમાંથી કૅપ્ટન ધોનીનો બૅટિંગ-પર્ફોર્મન્સ સૌથી ખરાબ છે. તેણે ચાર ટેસ્ટમાં ૩૮ રનના હાઇએસ્ટ સ્કોર સાથે કુલ માત્ર ૧૪૧ રન બનાવ્યા છે.

૧૭ ભારતીયોમાંથી ૧૦ પ્લેયરો

પહેલી જ વખત ઑસ્ટ્રેલિયામાં ટેસ્ટમૅચ રમશે એટલે તેમનો પર્ફોર્મન્સ કેવો રહેશે એ ટીમ ઇન્ડિયા માટે મોટી ચિંતાનો વિષય છે.