બિલ ડેલ્ટને ભારત અને ન્યુ ઝીલૅન્ડના ક્રિકેટરોને આપી સલાહ
નેપિયર શહેરના મેયર બિલ ડેલ્ટન
બુધવારે ન્યુ ઝીલૅન્ડમાં રમાયેલી ભારત અને ન્યુ ઝીલૅન્ડ વચ્ચેની પહેલી મૅચમાં આંખ પર આવતા સૂર્યપ્રકાશને કારણે મૅચ 30 મિનિટ સુધી અટકાવવી પડી હતી. નેપિયર શહેરના મેયર બિલ ડેલ્ટને આ મામલે બન્ને દેશના ક્રિકેટરોને સૂરજનો તડકો આંખ પર સહન કરી શકે એટલા મજબૂત બનવા કહ્યું હતું તેમ જ સવાલ પણ કર્યો હતો કે ભારતમાં આ પ્રકારની પરિસ્થિતિ ઊભી થઈ હોત તો ખેલાડીઓએ શું કર્યું હોત. આંતરરાષ્ટ્રીય ક્રિકેટમાં સૂરજના પ્રકાશને કારણે મૅચ અટકાવવામાં આવી હોય એવું પહેલી વાર બન્યું છે.
મેયરે કહ્યું હતું કે ‘મારા મતે તેઓ બહાર મેદાનમાં રમનારા ખેલાડીઓ છે. એથી સૂરજનો તડકો આંખ પર આવે એવી પરિસ્થિતિમાંથી તેઓ પસાર થઈ ચૂક્યા છે. મારા મતે તેમણે થોડાક મજબૂત થવું જોઈએ.’
ADVERTISEMENT
ન્યુ ઝીલૅન્ડ ક્રિકેટ બોર્ડના પ્રવક્તાએ કહ્યું હતું કે આ સમસ્યાનો અત્યારે તો કોઈ તરત ઉકેલ નથી. વિરાટ કોહલીએ મૅચ બાદ કહ્યું હતું કે ‘આવી ઘટના પહેલી વખત મારી કરીઅરમાં બની. અગાઉ ૨૦૧૪માં હું સૂરજનો તડકો આંખ પર આવતો હતો એથી જ આઉટ થયો હતો.’
આ પણ વાંચો : ટેસ્ટના પહેલા દિવસે ઇંગ્લૅન્ડના બોલર ઍન્ડરસને 33 રનમાં લીધી 4 વિકેટ
ડિનર-બ્રેક બાદ મૅચ 30 મિનિટ સુધી રોકવામાં આવી હતી. ન્યુ ઝીલૅન્ડના કૅપ્ટન કેન વિલિયમસને પણ સમગ્ર પરિસ્થિતિમાં હળવો ઉત્તર આપતાં કહ્યું હતું કે ‘સૂરજને ખેસડવાનું તેમ જ મેદાનની દિશા બદલી શકાય એમ નહોતું. એથી અમારી પાસે થોડો સમય રાહ જોવા સિવાય બીજો કોઈ વિકલ્પ નહોતો.’