"મેં મારો ફેવરિટ હેલિકૉપ્ટર શૉટ મારવાની ફરી શરૂઆત કરી દીધી છે"

Published: 15th October, 2011 19:41 IST

હૈદરાબાદ: ભારતે ઇંગ્લૅન્ડના નામોશીભર્યા પ્રવાસની બધી મૅચોમાં પરાજય જોયા પછી ગઈ કાલે સિરીઝની શરૂઆતમાં ૧૨૬ રનના માર્જિનથી વિજય માણ્યો હતો અને મહેન્દ્ર સિંહ ધોની આ શાનદાર જીતનો કર્ણધાર હતો. મૅન ઑફ ધ મૅચ માહી (૮૭ નૉટઆઉટ, ૭૦ બૉલ, ૧ સિક્સર, ૧૦ ફોર)ની આક્રમક ફટકાબાજીથી તેમ જ સુરેશ રૈના (૬૧ રન, પંચાવન બૉલ, બે સિક્સર, પાંચ ફોર) વચ્ચેની પાંચમી વિકેટ માટેની ૭૨ રનની ભાગીદારીથી ભારતે પાંચ મૅચની શ્રેણીમાં ૧-૦થી સરસાઈ મેળવી હતી. બીજી વન-ડે (બપોરે ૨.૩૦) સોમવારે દિલ્હીમાં રમાશે.

ધોનીના ૮૭ રન મૅચવિનિંગ હતા જ, તે ૧૦૦ કૅચ પકડનાર વન-ડેનો પ્રથમ વિકેટકીપર-બૅટ્સમૅન પણ બની ગયો

ગઈ કાલે ધોનીની હાફ સેન્ચુરી મૅચવિનિંગ નીવડી હતી, વિકેટકીપિંગમાં પણ તેનો પફોર્ર્મન્સ વિજય માટે ઘણો ઉપયોગી સાબિત થયો હતો. તેણે ક્રેગ કિઝવેટર (૭ રન)નો જે કૅચ પકડ્યો હતો એ તેનો ૧૦૦મો કૅચ હતો અને તે આ આંકડે પહોંચનાર વિશ્વનો એકમાત્ર વિકેટકીપર-બૅટ્સમૅન છે. બીજા નંબરે કુમાર સંગકારાના માત્ર ૫૯ કૅચ છે.

ગઈ કાલે ભારત સતત ૧૦ ઇન્ટરનૅશનલ મૅચ પછી પહેલી વાર જીત્યું હતું. આ ૧૦ મૅચોમાં ઇંગ્લૅન્ડ સામેની ચાર ટેસ્ટ, એક T20 અને ત્રણ વન-ડે તેમ જ એ પહેલાંના કૅરિબિયન પ્રવાસની છેલ્લી બે વન-ડેનો સમાવેશ છે.

થોડા વખતથી મેં મારો ફેવરિટ હેલિકૉપ્ટર શૉટ મારવાનું બંધ કર્યું હતું, પરંતુ આ મૅચમાં એવા શૉટ ફટકારવાનું મન થઈ ગયું અને નસીબજોગે એની અજમાયશથી મૅચવિનિંગ ઇનિંગ્સ રમ્યો

- મહેન્દ્ર સિંહ ધોની

Loading...
 
 
This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK