કોહલીના સપોર્ટમાં આવ્યો યોહાન બ્લૅક

સતત ચાર ટેસ્ટ હારતાં વિરાટ કોહલી ટીકાકારોના નિશાના પર આવી ગયો છે અને ટેસ્ટમાં કૅપ્ટસી છોડીને અજિંક્ય રહાણેને સોંપી દેવાની માગણી થઈ રહી છે. જોકે આવા સમયે તેનો સૌથી મોટો પ્રશંસક અને ઑલિમ્પિક ગોલ્ડ મૅડલિસ્ટ જમૈકાના દોડવીર યોહાન બ્લૅક તેના સપોર્ટમાં આવ્યો છે.

સોશ્યલ મીડિયા પર એક વિડિયો શૅર કર્યો હતો જેમાં વિરાટ વિશે તેણે કહ્યું હતું કે ‘મને તેના વિશે સૌથી વધુ એ પસંદ છે કે તે કોઈ દિવસ બીજાને દોષ નથી આપતો, પણ પોતે જ બધી ભૂલોની જવાબદારી લઈ લે છે. તેની કૅપ્ટસીની આ વાત મને સૌથી વધુ પસંદ છે.’

વધુમાં બ્લૅકે કહ્યું હતું કે ‘હવે એ જોવા ઉત્સુક છે કે પહેલી મૅચમાં હાર બાદ ટીમ ઇન્ડિયા કેવી રીતે કમબૅક કરે છે. આ ટેસ્ટ ક્રિકેટ અત્યારે બેસ્ટ લેવલ પર છે. ભારત પહેલાં ઑસ્ટ્રેલિયામાં ૦-૧થી પાછળ હતું, હવે ઘરઆંગણે ૦-૧થી પાછળ છે. મને ટેસ્ટ ક્રિકેટ પસંદ છે, કેમ કે એ માનસિક રીતે તમારી પરીક્ષા લે છે. બીજી ટેસ્ટને લઈને ખૂબ ઉત્સુક છું.’